“არ შეიძლება ერთმნიშვნელოვნად იმის თქმა, რომ “ოცნება“ პრორუსულია, უნდა ვიმსჯელოთ ფაქტებით და არა ვიღაცის სპეკულაციების მიხედვით”

არ შეიძლება ერთმნიშვნელოვნად იმის თქმა, რომ „ქართული ოცნება“ პრორუსულია, უნდა ვიმსჯელოთ ფაქტებით და არა ვიღაცის სპეკულაციების მიხედვით. კონკრეტულად რაში გამოიხატება ეს პრორუსულობა? თქვან და შემდეგ ვიმსჯელოთ, – ამის შესახებ თორნიკე შარაშენიძემ გამოცემა „ალიონი XXI-თან“ ინტერვიუში განაცხადა. მისი თქმით, საქართველო აშკარად არ გამოიყენება სანქციებისთვის გვერდის ასავლელად, ქვეყანამ ყველა საერთაშორისო ორგანიზაციაში ხმა მისცა რუსეთის წინააღმდეგ, საქართველოდან რუსეთში ყველი და რძე არ გატანილა და ქვეყანაში არც „მირ-ის“ გადახდის სისტემა მუშაობს.

„უკრაინაში ომის დაწყების შემდეგ, ხშირ შემთხვევაში, რიტორიკა იყო ცუდი და გაუგებარი. მოქმედებები არ იყო არც უკრაინული და არც პრორუსული. ყოველ შემთხვევაში, ჯერჯერობით, საქართველო აშკარად არ გამოიყენება სანქციებისთვის გვერდის ასავლელად. საქართველოში არ მუშაობს მაგალითად, „მირ-ის“ გადახდის სისტემა. საქართველომ ყველა საერთაშორისო ორგანიზაციაში ხმა მისცა რუსეთის წინააღმდეგ და ამის შემდეგ არანაირი ყველი და რძე არ გაუტანიათ საქართველოდან რუსეთში. ამ მხრივ, კითხვის ნიშნები მოიხსნა. კი, ვიღაც-ვიღაცებს შეუძლიათ უფრო ნორმალურად ილაპარაკონ, უფრო ფრთხილად და მოზომილად, მით უმეტეს, რაც ხდება ამ ტრაგედიის და უკრაინის ფონზე. ლაპარაკი ერთია და საქმე მეორე” – აცხადებს თორნიკე შარაშენიძე.