საქართველოსა და ამერიკას შორის დიპლომატიური ურთიერთობების დამყარებიდან ძალიან მნიშვნელოვანი თარიღია 30 წელი და ეს 30 წელი არის ასევე ჩვენი დამოუკიდებლობის წლები, დაწყებული პირველი წლიდან, ამერიკა იყო ერთ-ერთი პირველი, ვინც აღიარა საქართველოს დამოუკიდებლობა და სუვერენიტეტი, – ამის შესახებ საქართველოს საგარეო საქმეთა მინისტრმა, დავით ზალკალიანმა განაცხადა.
საგარეო უწყების ხელმძღვანელის თქმით, ფასდაუდებელია ის წვლილი, რომელიც ამერიკის შეერთებულმა შტატებმა შეიტანა საქართველოს გაძლიერებაში, თავდაცვისუნარიანობის გაზრდაში, ეკონომიკური მდგრადობის უკეთ წარმოჩენაში.
„რა თქმა უნდა ჩვენი საერთაშორისო როლის და ფუნქციის აღიარებაში მართლაც ძალიან დიდი როლი მიუძღვის ჩვენს მთავარ სტრატეგიულ პარტნიორს და აღსანიშნავია, რომ ამ 30 წლის განმავლობაში ეს თანამშრომლობა ყოველწლიურად ღრმავდებოდა, თვისობრივად ახალ დონეზე ადიოდა, წელს გვაქვს უპრეცედენტოდ უმაღლესი ნიშნული ამ სტრატეგიული პარტნიორობის და თანამშრომლობის. აღსანიშნავია, რომ ამ წლების განმავლობაში ჩამოყალიბდა ჩვენი ურთიერთობის ერთ-ერთი მთავარი ჩარჩო ფორმატი, რომელიც გახლავთ ამერიკა-საქართველოს შორის სტრატეგიული პარტნიორობის ქარტია, რომელიც მოიცავს ჩვენი თანამშრომლობის ოთხ ძირითად მიმართულებას, ეს არის თავდაცვა და უსაფრთხოება, ეკონომიკური განზომილება, დემოკრატიული ინსტიტუტების აღმშენებლობა და ხალხთა შორის ურთიერთობა. ამ ოთხივე მიმართულებით მართლაც ხელშესახები პროგრესი გვაქვს“, – განაცხადა ზალკალიანმა.
მინისტრის განცხადებით, საქართველომაც თავისი წვლილი შეიტანა მთავარ სტრატეგიულ პარტნიორთან ერთად გლობალური უსაფრთხოების გამოწვევების წინააღმდეგ ბრძოლაში.
„ჩვენ ვიყავით ჩვენი მთავარი სტრატეგიული პარტნიორის გვერდით ყველაზე მძიმე წუთებში, მაშინ, როდესაც მას სჭირდებოდა პარტნიორების დახმარება, მხედველობაში მაქვს ავღანეთში მიმდინარე უსაფრთხოების ოპერაცია, ჩვენ ერთად შევედით ავღანეთში და ერთად გამოვედით ავღანეთიდან. 32-მა გმირმა ქართველმა სამხედრომ თავი დადო გლობალური უსაფრთხოების გამოწვევების წინააღმდეგ ბრძოლაში ჩვენს მთავარ სტრატეგიულ პარტნიორ ამერიკის შეერთებულ შტატებთან. უნდა აღინიშნოს, რომ საქართველო დღეს არის რეგიონში ამერიკის შეერთებული შტატების ყველაზე ახლო და სანდო მოკავშირე, ეს არის ერთ-ერთი ყველაზე მნიშვნელოვანი მიღწევა, რაც ჩვენ 30 წლის განმავლობაში გვაქვს და დარწმუნებული ვარ, რომ ეს ურთიერთობები კიდევ მრავალ წლებს მოითვლის. განსაკუთრებით დღეს, როდესაც მსოფლიოში ასეთი სერიოზული გამოწვევაა, ფასდაუდებელია ამერიკის შეერთებული შტატების როლი, ჩვენ ვფიქრობთ, რომ ის თანამშრომლობა, რომელიც ჩვენ გვაქვს თავდაცვის და უსაფრთხოების სფეროში კიდევ უფრო უნდა განვითარდეს, ასევე მსგავს ნიშნულზე უნდა ავიყვანოთ ჩვენი სავაჭრო ეკონომიკური ურთიერთობები“, – განაცხადა ზალკალიანმა.
დავით ზალკალიანი აცხადებს, რომ ამერიკის შეერთებულ შტატებთან თავისუფალი სავაჭრო ურთიერთობების განვითარება არის ერთ-ერთი პრიორიტეტული მიმართულება.
„სიამაყით მინდა აღვნიშნო, რომ ჩვენ გვაქვს არამხოლოდ აღმასრულებელ ხელისუფლებასთან თანამშრომლობის უმაღლესი ნიშნული, არამედ საკანონმდებლო ხელისუფლებასთან. ის საკანონმდებლო უპრეცედენტო ინიციატივები, რომელიც არის ყოვლისმომცველი და რომლის მსგავსიც საქართველოს არ ჰქონია დამოუკიდებლობის ისტორიაში, საქართველოს მხარდამჭერი აქტი მაქვს მხედველობაში, მართლაც ყოვლისმომცველია. წელს სენატმა დაამტკიცა ასიგნებათა კონსოლიდირებული საბიუჯეტო აქტი, სადაც კიდევ ერთხელ არის ფინანსურ მხარდაჭერაზე საუბარი და სადაც კიდევ ერთხელ არის ძალიან მკაფიო მძლავრი გზავნილები საქართველოსთან, ოკუპირებულ ტერიტორიებთან მიმართებაში. ერთ-ერთი მნიშვნელოვანი გარანტორი ჩვენი უსაფრთხოების არის ამერიკის შეერთებული შტატები. ამავე დროს ძალიან მნიშვნელოვანია, რომ ჩვენ უახლოეს პერიოდში ეკონომიკური მიმართულებით კერძოდ თავისუფალი ვაჭრობის შესაძლებლობების გაჩენის თვალსაზრისით კიდევ უფრო გავაღრმავოთ და გავააქტიუროთ მუშაობა ჩვენს მთავარ სტრატეგიულ პარტნიორთან. ჩვენ გვინდა, რომ რაც შეიძლება მეტი ამერიკული ბიზნესი ვიხილოთ საქართველოში, რადგანაც ბიზნესის შემოსვლა არის ქვეყნის უსაფრთხოებასთანაც დაკავშირებული, როდესაც ამერიკული ინვესტიციები და ბიზნესი შემოდის ამით ჩვენი როლი, ფუნქცია რეგიონში კიდევ უფრო იზრდება და ამასთან ერთად, დაცულობა ჩვენი უსაფრთხოების კიდევ უფრო ფართოვდება, ამიტომ ეს ორი მიმართულება იქნება ერთ-ერთი პრიორიტეტული მიმართულებები უახლოესი პერიოდის განმავლობაში“, – განაცხადა ზალკალიანმა.