ჩვენ ახალგაზრდების, მომავალი თაობის, საომარ მოქმედებებში ჩართვა არ გვინდა, მათ შორის, არც ამ საკითხთან დაკავშირებით, ეს არ შეესაბამება ჩვენს ინტერესებს, ასე რომ, ჩვენი პოზიცია უცვლელია და ამ პოზიციას არავითარი საფრთხე არ ემუქრება, – ამის შესახებ პარლამენტის პირველმა ვიცესპიკერმა, გია ვოლსკიმ ჟურნალისტებს განუცხადა.
ვოლსკის თქმით, ის შეშფოთებულია ინფორმაციით, თითქოს, მსჯელობა მიმდინარეობს, რომ ტერიტორიული მთლიანობის საკითხის მოგვარება ძალისმიერი მეთოდით განიხილება, რაც დეპუტატის განმარტებით, სინამდვილეს არ შეესაბამება.
მან აფხაზებს, ოსებსა და ქართველებს მიმართა და აღნიშნა, რომ “ჩვენ ვიცით ფასი მეგობრობის, სიყვარულის, ვიცით შენდობა ცოდვების და ვიყურებით მომავალში”.
„ძალიან გახშირდა იმაზე საუბარი, მათ შორის, არასამთავრობო ორგანიზაციებთან მქონდა შეხვედრა, წერილითაც გაავრცელეს მათ განცხადება, რიგი არასამთავრობო ორგანიზაციები აკეთებენ ამ განცხადებას, რომ ოკუპირებულ ტერიტორიებზე აფხაზეთსა და ცხინვალის რეგიონში ადგილობრივი მოსახლეობა და არა მარტო ქართველები, ვინც არიან ახლა ოკუპირებულ ტერიტორიაზე, შეშფოთებულები არიან იმ ინფორმაციით, რომ ჩვენ განვიხილავთ ინტენსიურად და თითქოს ასეთი ტრენდი არსებობს, რომ მსჯელობა მიმდინარეობს იმ საკითხთან დაკავშირებით, რომ ტერიტორიული მთლიანობის საკითხის მოგვარება შეიძლება მოხდეს ძალისმიერი მეთოდით, რაც რასაკვირველია, სინამდვილეს არ შეესაბამება. ჩვენი პრინციპი არის ურღვევი და აფხაზებსაც, ქართველებსაც და ოსებსაც თქვენი [ჟურნალისტების] მეშვეობით მინდა გადავცე, ჩვენ ვიცით ფასი მეგობრობის, სიყვარულის, ვიცით შენდობა ცოდვების და ვიყურებით მომავალში. ჩვენ ახალგაზრდების, მომავალი თაობის საომარ მოქმედებებში ჩართვა არ გვინდა, მათ შორის, არც ამ საკითხთან დაკავშირებით, ეს არ შეესაბამება ჩვენს ინტერესებს, ასე რომ ჩვენი პოზიცია უცვლელია და ამ პოზიციას არავითარი საფრთხე არ ემუქრება,” – განაცხადა ვიცესპიკერმა.