ომის 32-ე დღე უკრაინაში. საბრძოლო მოქმედებები გრძელდება! ხარკოვში, რომელიც მთელი ღამე იბომბებოდა, უკრაინული მხარის ინფორმაციით, შეიარაღებული ძალები პოზიციების დაკავებას განაგრძობენ, ზოგიერთ რაიონში დაიწყეს კონტრშეტევა. უკრაინის გენშტაბის ცნობით, ხარკოვის რეგიონში ოკუპანტები ზარალს განიცდიან და გაქცევის დროს აღჭურვილობასაც ტოვებენ.
მთავარ გამოწვევად, როგორც უკრაინის დედაქალაქში, ასევე უკრაინის ყველა დიდ ქალაქში რჩება დივერსიული ჯგუფები. უკრაინის შინაგან საქმეთა სამინისტროს ინფორმაციით, ხარკოვში და კიდევ რამდენიმე ოლქში დააკავეს დივერსანტები, რომლებიც არეულობის მოწყობას გეგმავდნენ და კონკრეტული დავალებებით იყვნენ გაგზავნილი ამ ქალაქებში.
“უკრაინის უსაფრთხოების სამსახურმა ხარკოვის რეგიონში დააკავა დივერსანტები, რომელიც კოორდინაციას უწევდა დივერსიულ ჯგუფებსა და ტერორისტულ დაჯგუფებებს დონეცკისა და ლუგანსკის რეგიონებში. ოდესის რეგიონში უკრაინის უსაფრთხოების სამსახურმა, მოლდოვის დაზვერვის სამსახურთან თანამშრომლობით, გამოააშკარავა ტრანსნაციონალური ორგანიზებული დანაშაულებრივი ჯგუფი, რომელიც უკანონოდ ატარებდა უკრაინელ წვევამდელებს საზღვარგარეთ.
დნეპრში უკრაინის უსაფრთხოების სამსახურმა დააკავა პირი, რომელიც აგროვებდა ინფორმაციას დნიპროს კრიტიკული ინფრასტრუქტურის დაწესებულების თანამშრომლების, მათი პოლიტიკური ორიენტაციისა და რუსეთის ფედერაციისადმი ლოიალობის დონის შესახებ.
ივანო ფრანკოვსკის რეგიონში ამხილეს აგიტატორი, რომელიც ანტიუკრაინულ კონტენტს ავრცელებდა. ომის პირველ დღეს მან რუსული ნომრის მქონე აბონენტს გაუგზავნა სარაკეტო თავდასხმის ფოტო ივანო-ფრანკოვსკის აეროპორტში,” – აცხადებს უკრაინის უსაფრთხოების სამსახურის სპიკერი არტემ დეხტიარენკო.
ბრძოლა გრძელდება უკრაინის დედაქალაქის შემოგარენში და კიევის ოლქის რამდენიმე სოფელში. სოფელ მაკარივში მოსახლეობა ამბობს, რომ გუშინ მთელი ღამის განმავლობაში ინტენსიური დაბომბვის და სროლის ხმა ესმოდათ, ასევე გაჩნდა ხანძარი, დამწვარია რამდენიმე საცხოვრებელი სახლი.
“როგორც ამბობენ, მარიუპოლში შენობების 90% განადგურებულია. ამბობენ, რომ თავიანთ გარდაცვლილებსაც ვერ ასაფლავებენ. კოშმარია. აქ მაკარივში ბევრი ადამიანი საკუთარ უკანა ეზოში დამარხეს. ჩემმა ნაცნობმა, რომელიც ამ ქუჩაზე ცხოვრობს, მითხრა, რომ ქალიშვილი მოუკლეს. იქ მოდიოდა როცა ჭურვი მოხვდა. ახლა სასაფლაოზე ვერ წახვალ, ძალიან საშიშია. ბაღში დაასაფლავეს. ეს ჩვენი ეკლესიაა. ჯერ კიდევ დგას,” – ამბობს ადგილობრივი.
გასათვალისწინებელია ის ფაქტიც, რომ უკრაინის უსაფრთხოების სამსახურმა მაქსიმალურად შეზღუდა მედიის მუშაობა. როგორც უწყებაში აცხადებენ, მტრის დარტყმების ადგილებიდან ფოტო და ვიდეო მასალის გავრცელება დაისჯება სისხლის სამართლის კოდექსით, უცხოელი ჟურნალისტების შემთხვევაში, ჯაშუშობის, ხოლო უკრაინელების შემთხვევაში, სამშობლოს ღალატის მუხლით.