პარტია „მოქალაქეების“ წევრმა, ლევან იოსელიანმა საქართველოს ევროინტეგრაციის პროცესზე ისაუბრა და აღნიშნა, რომ საქართველოსთან ერთად, ბრიუსელშიც ნამდვილად არის განაცხადა, რომ რაღაც შესაძლებლობების ფანჯარა გაიხსნა.
მისივე თქმით, საქართველომ ეს შესაძლებლობა ხელიდან არ უნდა გაუშვას.
ამასთან, ლევან იოსელიანი ამბობს, რომ მიზნის მისაღწევად საქართველოზე ბევრი რამ არის დამოკიდებული, რაშიც მოიაზრება რეფორმები და ის მოთხოვნები, რასაც ევროკავშირი აყენებს.
„ნამდვილად არის განცდა საქართველოშიც და აქაც, ბრიუსელშიც, რომ რაღაც შესაძლებლობების ფანჯარა გაიხსნა ამ შემთხვევაში, საქართველოსთვის, მაგრამ ისიც უნდა გვახსოვდეს, რომ ჩვენზე ბევრი რამ არის დამოკიდებული. ჩვენს ინსტიტუციურ რეფორმებზე, საშინაო დავალების შესრულებაზე და იმ მოთხოვნებზე, რასაც ამ შემთხვევაში, ევროკავშირი გვიყენებს. თუ ჩვენ არ წავალთ ძალიან სერიოზული რეფორმების გზით, გაგვიჭირდება აქ ჩვენი კოლეგების დარწმუნება, რომ საქართველო ამ შესაძლებლობის ფანჯრის ფარგლებში დაჩქარებულად რაღაცას იმსახურებს. ამიტომ, ჩვენზე ძალიან ბევრი რამაა დამოკიდებული, თუმცა ძალიან მიხარია, რომ აქ, ბრიუსელში განწყობა არის ბევრად განსხვავებული. ყველა ხვდება, რომ შეიცვალა გარემოება და უკრაინის ომიდან გამომდინარე, განსხვავებული მიდგომები არის საჭირო, მათ შორის გამოჩენილი იყოს საქართველოს მიმართაც. ეს არის ძალიან მნიშვნელოვანი და ჩვენ ეს შესაძლებლობა ხელიდან არ უნდა გავუშვათ“, – განაცხადა ლევან იოსელიანმა.
ცნობისთვის, საქართველოს პარლამენტის თავმჯდომარე შალვა პაპუაშვილი ვიზიტით ბრიუსელში იმყოფება. საპარლამენტო დელეგაციის შემადგენლობაში შედიან ლევან იოსელიანი, მაკა ბოჭორიშვილი და ლევან ქარუმიძე.