ბერი ანდრიას სახელობის სარეაბილიტაციო-სასტუმრო სახლის მშენებლობა იწყება.
საქართველოს პრემიერ-მინისტრი გიორგი კვირიკაშვილი დღეს სახლის პროექტის პრეზენტაციას დაესწრო.
კვირიკაშვილის თქმით, ხელისუფლება ყველაფერს გააკეთებს, რომ ეს პროექტი იყოს ისეთი, როგორსაც პატარა ანგელოზები იმსახურებენ. კვირიკაშვილმა ბერი ანდრიას სახელობის სასტუმროს ხელმძღვანელს დედა თინათინს მადლობა გადაუხადა.
”აქ არ არის საუბარი მხოლოდ იმაზე, რომ ბავშვებს დავეხმაროთ და გავუადვილოთ ტკივილი. აქ საუბარია იმ თანადგომაზე, იმ სულისკვეთების გაძლიერებაზე, რომელსაც უწყობთ ხელს თქვენი პირადი მოღვაწეობით. მინდა, რომ დიდი მადლობა გადაგიხადოთ როგორც ერთმა უბრალო ადამიანმა და ვფიქრობ, რომ აქ ბევრი საუბარი არ არის საჭირო. მე წამოვიღე ინფორმაცია, თუ რა ნაბიჯები გადავდგით ჩვენ. ეს მართლა ძალიან მნიშვნელოვანი იყო. აქ არის ასობით ადამიანი, რომელსაც შეუმსუბუქდა ყოფა იმის შედეგად, რაც სახელმწიფომ რაღაც ნაბიჯები გადადგა და მე ვფიქრობ, რომ დღეს ამაზე არ უნდა ვისაუბროთ. უნდა ვისაუბროთ მხოლოდ იმ სულისკვეთებაზე, რაც აქ სუფევს და ეს უნდა გავრცელდეს ყველგან, მთელს ქვეყანაში”, – განაცხადა კვირიკაშვილმა.
მისივე თქმით, ეს სულისკვეთება უნდა გავრცელდეს ხელისუფლებაში, უნდა გავრცელდეს კერძო სექტორში და მთლიანად მოსახლეობაში.
”ჩვენი მოვალეობაა ღმერთის, ქვეყნის და ამ ბავშვების წინაშე რომლებიც გვყავს, ეს გამოწვევაა თუ პრობლემა, შეიძლება ნებისმიერს ეწვიოს, ამიტომ ეს არის უბრალოდ ის, რომ ამ მომენტში უნდა გავამაგროთ ერთმანეთი და გადავატანინოთ ერთმანეთს პრობლემა, რომელიც შეიძლება მოგვარდეს. დიდი მადლობა თქვენ და მინდა ყველა ჩვენს თანამოქალაქეს გაიზიაროს ეს სულისკვეთება და რაც შეიძლება გვერდით დაუდგეს ამ საქმეს. ჩვენ, ჩვენი მხრივ ყველაფერს გავაკეთებთ. გავაკეთებთ, რომ ეს პროექტი იყოს ისეთი, როგორსაც ეს ანგელოზები იმსახურებენ”, – აღნიშნა პრემიერ-მინისტრმა.