ავტომანქანებზე ციმციმა მხოლოდ კანონით დადგენილი წესით უნდა იყოს გამოყენებული, – ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე განაცხადა.
გიორგი კვირიკაშვილმა შს მინისტრს მიმართა გაატაროს შესაბამისი ზომები, რათა ქალაქის ქუჩებსა თუ ავტობანებზე ციმციმებიანი ავტომანქანების მოძრაობა შეიზღუდოს.
„ამ დღეების განმავლობაში არაერთხელ შემხვდა ციმციმებიანი შავი “ჯიპების” მოძრაობა, არამარტო ქალაქში, არამედ ავტობანებზეც. მინდა გთხოვოთ, შესაბამისი ზომები იქნას მიღებული პატრულის მხრიდან. მე პირადად პრემიერის მანქანაზე თითქმის არ ვიყენებ ამ სოციალური სიგნალების მაჩვენებელს და მინდა, გთხოვოთ, ყველა ფუნქციონერმა გაითავისოს იგივე სტანდარტი და ციმციმა მხოლოდ კანონის დადგენილი წესით იყოს გამოყენებული. შუქურა, საკმაოდ გამაღიზიანებლად მოქმედებს ჩვენს მოსახლეობაზე. მინდა გთხოვოთ, შესაბამისი ზომები იქნება გასატარებელი. დიდი იმედი მაქვს, ამ განცხადების შემდეგ თვითონ მიიღებენ ისეთ ზომებს. თუ მაინც იქნება გამონაკლისი შემთხვევები, გთხოვთ, მიიღოთ შესაბამისი ზომები, რათა აღკვეთოთ ასეთი ტიპის მოძრაობა ქუჩებში, ქალაქებსა თუ ავტობანებზე“, – განაცხადა გიორგი კვირიკაშვილმა.