საქართველოს პარლამენტის თავმჯდომარე შალვა პაპუაშვილმა ბუჩაში, ირპენსა და უკრაინის სხვა ქალაქებში მომხდარი შემთხვევების გამო მწუხარება გამოთქვა.
როგორც ბიუროს სხდომის დაწყებისას პაპუაშვილმა განაცხადა, საერთაშორისო სასამართლომ უნდა გამოიძიოს ომის დანაშაული, გამოავლინოს და დასაჯოს ყველა დამნაშავე.
ამასთან, ბიუროს სხდომაზე დეპუტატებმა უკრაინაში ომის დროს დაღუპულებს წუთიერი დუმილით პატივი მიაგეს.
„მინდა, მწუხარება გამოვთქვა იმასთან დაკავშირებით, რასაც ჩვენ ამ დღეებში ვხედავთ ბუჩაში, ირპენში, უკრაინის სხვა ქალაქებში. ალბათ რთულია, მოიძებნოს სიტყვა, რომელიც მძიმე სურათების ხილვის შემდეგ ადამიანის ემოციას აღწერს. სამწუხაროდ, ამ ტრაგედიას ბოლო არ უჩანს. როგორც ჩანს, ბოლო არ უჩანს სისასტიკეს, რომელსაც ჩვენ ვხედავთ უკრაინაში. იცით, საქართველოს ხელისუფლება თანაავტორია მიმართვისა სისხლის სამართლის საერთაშორისო სასამართლოსთვის და მოწოდებისა, რომ სასამართლომ გამოიძიოს ომის ყველა დანაშაული, გამოავლინოს და დასაჯოს ყველა დამნაშავე. იმ სურათს, რაც ჩვენ ამ დღეებში ვნახეთ, შესაბამისი რეაგირება სჭირდება. კიდევ ერთხელ პირადად, პარლამენტის სახელით მივმართავ ყველა საერთაშორისო ორგანიზაციას, ჩავიდნენ ადგილზე, თავად გამოიკვლიონ, გამოიძიონ, შეისწავლონ და შესაბამისი პასუხისმგებლობა დააყენონ ყველა იმ ადამიანის, რომელიც ასეთი სისასტიკის ავტორია. მინდა, წუთიერი დუმილით პატივი მივაგოთ უკრაინაში დაღუპულების ხსოვნას“, – განაცხადა შალვა პაპუაშვილმა.