საქართველოს პრემიერ-მინისტრი გიორგი კვირიკაშვილი კოლუმბიაში მომხდარი ავიაკატასტროფის მსხვერპლთა ოჯახებს თანაგრძნობას უცხადებს.
ამის შესახებ პრემიერმა ”ტვიტერზე” დაწერა.
”თანავუგრძნობ კოლუმბიაში მომხდარი დღევანდელი ავიაკატასტროფის მსხვერპლთა, მათ შორის, საფეხბურთო კლუბ „შაპეკოენსის“ ფეხბურთელთა ოჯახებს, ყველას, ვისაც ეს საზარელი ტრაგედია შეეხო”, – წერს გიორგი კვირიკაშვილი ”ტვიტერზე”.
კოლუმბიის ხელისუფლების წარმომადგენლების ინფორმაციით, სამშაბათს დილით თვითმფრინავმა, რომელშიც 72 მგზავრი იმყოფებოდა, კატასტროფა განიცადა. თვითმფრინავი მედელინისკენ მიემართებოდა. მასში იმყოფებოდნენ ბრაზილიური საფეხბურო კლუბის „შაპეკოენსის“ ფეხბურთელები, რომლებსაც მედელინში ადგილობრივ გუნდთან „ატლეტიკო ნასიონალთან“ სამხრეთ ამერიკის თასის ფინალურ თამაშში უნდა მიეღოთ მონაწილეობა.
გავრცელებული ინფორმაციით, კატასტროფის მიზეზად საწვავის ნაკლებობა სახელდება.