საქართველოს პარლამენტის ვიცე-სპიკერი ლევან იოსელიანი აცხადებს, რომ უკრაინის საგარეო საქმეთა მინისტრ დმიტრო კულებას განცხადებაზე, მტკიცებულებების გარეშე რაიმე დასკვნის გაკეთება რთულია.
საუბარია განცხადებაზე, სადაც კულება ამბობს: „ველოდებით ოფიციალურ მტკიცებულებებს და დამაჯერებელ არგუმენტებს საქართველოსგან, რომ ისინი ამას არ აკეთებენ. შემდეგ გადავწყვეტთ, როგორ ვიმოქმედოთ, თუ ეს მტკიცებულებები და არგუმენტები არ იქნება საკმარისად დამაჯერებელი“.
როგორც ლევან იოსელიანმა აღნიშნა, სამწუხაროა, რომ საქართველოსა და უკრაინას შორის ურთიერთობა დაბალ ნიშნულზეა და ქვეყნიდან ელჩის კი გაწვეულია.
„ამაში არის საქართველოს ხელისუფლების ბრალიც, რადგან მთელი რიგი გზავნილები შეიძლებოდა განსხვავებული ყოფილიყო და ეს ყველაფერი ასე არ წარმართულიყო. რაც შეეხება კულებას განცხადებას, ეს ის საკითხია, სადაც მტკიცებულებების გარეშე რაიმე დასკვნის გაკეთება რთული იქნება. ვინ უნდა წარადგინოს მტკიცებულებები? – ალბათ, იმ მხარემ, ვინც ბრალი დაგვდო. თუ ჩვენს მხარეს რაიმე აქვს წარსადგენი, კარგი იქნება, თუ წარმოადგენს და ამ ყველაფერს უფრო ნათელს გახდის პირველ რიგში ქართული საზოგადოებისთვის, ხომ არ ხდებოდა რაიმე იარაღის მიწოდება რუსეთისთვის“, – განაცხადა იოსელიანმა.