„ევროპელი სოციალისტების“ თავმჯდომარის ფრიდონ ინჯიას განცხადებით, უკრაინას თუ აქვს რაიმე სახის მტკიცებულება, რომ საქართველოს ტერიტორიიდან გადიოდა შეიარაღება რუსეთის ფედერაციაში, უნდა წარადგინოს.
„სხვა შემთხვევაში, საქართველოს ხელისუფლებას შეუძლია, გააკეთოს განცხადება, რომ საზღვარზე, რომელიც არის საქართველოსა და რუსეთს შორის, ყველა ქმედება კანონით გათვალისწინებული წესით და რიგით ხორციელდება“, – აღნიშნა ფრიდონ ინჯიამ.
რაც შეეხება კითხვას, რა საფუძველი შეიძლება ჰქონოდა უკრაინის დაზვერვას ასეთი განცხადების გასავრცელებლად, ინჯია არ გამორიცხავს, რომ უკრაინისთვის ვინმეს მცდარი ინფორმაცია მიეწოდებინა.
„შეიძლება, ვიღაცამ მცდარი ინფორმაცია მიაწოდა უკრაინის საგარეო საქმეთა სამინისტროს და დროის უქონლობისა და უკრაინაში საგანგებო მდგომარეობის გამო, შეიძლება, ვერ მოახერხეს საკმარისად გადამოწმება იმ ინფორმაციის, რაც მიაწოდეს. იარაღის უკანონო გადატანა-გადმოტანა, ეს სპეციალური სამსახურების კომპეტენციაა“, – განაცხადა ფრიდონ ინჯიამ.