“9 მაისს ფაშიზმზე გამარჯვების დღე აღინიშნება ნატოს წევრ რუმინეთსა და ჰოლოკოსტით დაზარალებულ ისრაელში – ასე რომ, გაყოფა მთლად ასეც არ არის!”

9 მაისს ფაშიზმზე გამარჯვების დღე აღინიშნება ნატოს წევრ რუმინეთსა და ჰოლოკოსტით დაზარალებულ ებრაელთა სახელმწიფო ისრაელში – ასე რომ, გაყოფა მთლად ასეც არ არის, – ამის შესახებ პარლამენტის თავმჯდომარე შალვა პაპუაშვილმა ბიუროს სხდომაზე განაცხადა, რითაც გამოეხმაურა ოპოზიციის წარდგენილ ინიციატივას, რომელიც ფაშიზმზე გამარჯვების თარიღის 9 მაისის ნაცვლად, 8 მაისს აღნიშვნას გულისხმობს.

უმრავლესობამ კანონპროექტის დაჩქარებული წესით განხილვას მხარი არ დაუჭირა.

„შრომის კოდექსში” ცვლილებები, რომელიც უქმე დღედ 8 მაისის გამოცხადებას ითვალისწინებს, დეპუტატებმა – თეონა აქუბარდიამ, არმაზ ახვლედიანმა, ხათუნა სამნიძემ, გიორგი ვაშაძემ, ტარიელ ნაკაიძემ და პაატა მანჯგალაძემ მოამზადეს.