თუ რამე შეიძლება შეთქმულებების თეორიას დაეყრდნოს და ამ თეორიიდან ასეთი დასკვნა გააკეთოს, არის ბატონი საყვარელიძის ეს დასკვნა, რომ თურმე ამ ომის პროვოკატორი და მთავარი დაინტერესებული მონაწილე ყოფილა ამერიკის შეერთებული შტატები,- ამის შესახებ პარტია „გირჩის“ ლიდერმა ვახტანგ მეგრელიშვილმა „ქრონიკის“ პირდაპირ ეთერში ისაუბრა.
„ეს განცხადება არის ან სრულიად გაუაზრებელი ან პროვოკაციული რუსული პროპაგანდა იმის შესახებ, რომ ამ ომს აწარმოებს დასავლეთი რუსეთის წინააღმდეგ და რომ დასავლეთი დაინტერესებულია არა კონფლიქტის დროულად დასრულებაში, ადამიანური მსხვერპლის შემცირებაში, ანუ რაც არის დასავლური სამყაროს ღირებულებები, არამედ თურმე ზუსტად ანალოგიურ თამაშებს თამაშობს ამერიკა, მას აწყობს ეს ომი, ამ ომის გახანგრძლივება, ადამიანური სიკვდილი იმისთვის, რომ მან მიიღოს სარგებელი. ასეთი პოზიცია ფაშისტურია, თუ რამე შეიძლება შეთქმულებების თეორიას დაეყრდნოს და ამ თეორიიდან ასეთი დასკვნა გააკეთოს, არის ბატონი საყვარელიძის ეს დასკვნა, რომ თურმე ამ ომის პროვოკატორი და მთავარი დაინტერესებული მონაწილე ყოფილა ამერიკის შეერთებული შტატები. ეს ყველაფერი მაშინ, როდესაც ჩვენ უკრაინაში ვნახეთ, რომ უკრაინელები ერთხმად აღიარებენ, რომ თუ ვინმე ეხმარება დღეს უკრაინას ეს ამერიკის შეერთებული შტატებია. ეს ძალიან სერიოზული პრობლემაა და მე როდესაც ამის შესახებ დავწერე სოციალურ ქსელში, მითხრეს, რომ „ნაციონალური მოძრაობა“ ამ განცხადებას გაემიჯნებოდა“,- განაცხადა ვახტანგ მეგრელიშვილმა.
უკრაინის გენერალური პროკურორის ყოფილმა მოადგილემ, დავით საყვარელიძემ, უკრაინაში მიმდინარე მოვლენების შეფასებისას აღნიშნა, რომ „ზოგიერთი ქვეყანა, თუნდაც შეერთებული შტატები არ ჩქარობს, რომ [უკრაინაში მიმდინარე] ომი დაამთავროს ორ კვირაში ან ერთ თვეში“.