ის, რომ მას აქვს იმის შესაძლებლობა რევოლუციებზე იფიქროს, ალბათ, ადასტურებს იმას, რომ მას ამის გონებრივი და ფიზიკური შესაძლებლობებიც აქვს, – ამის შესახებ საქართველოს კულტურის, სპორტისა და ახალგაზრდობის მინისტრმა, თეა წულუკიანმა ტელეკომპანია „იმედის“ ეთერში საქართველოს მესამე პრეზიდენტზე, მიხეილ სააკაშვილზე საუბრისას განაცხადა.
მისი თქმით, ის, რომ ყველა პატიმარზე არის სამედიცინო ზედამხედველობა უზრუნველყოფილი, ეს მოიტანა „ქართულმა ოცნებამ“.
„ყველა პატიმარს სჭირდება მუდმივი ზედამხედველობა სამედიცინო სახით, ჯანმრთელია ის, თუ არა. ის, რომ ყველა პატიმარზე არის სამედიცინო ზედამხედველობა უზრუნველყოფილი, ეს მოიტანა ჩვენმა ხელისუფლებამ და როდესაც ვიყავი იუსტიციის მინისტრი და პენიტენციური სისტემა შემოგვიერთდა, ჩვენ დღე და ღამე ვშრომობდით ამ მიზნის შესასრულებლად, ისევე, როგორც ჩემი ყველა წინამორბედი „ქართული ოცნების“ დროს, ვინც სასჯელაღსრულების მინისტრი გახლდათ.
ეს დღესაც ასეა, ამჟამინდელი იუსტიციის მინისტრის მმართველობის პერიოდში და მოსამართლე იმის მოსამართლეა, რომ მან ყოველთვის ხაზი გაუსვას, რომ აღმასრულებელი ხელისუფლება არის ყველა პატიმრის, მათ შორის ბატონი სააკაშვილის ჯანმრთელობაზე პასუხისმგებელი. ჩვენ ვნახეთ ბევრი სპეკულაცია, რომ ის არის ცუდად, რომ გარდაიცვლება თუ არ მიხედავენ, მაგრამ მას აქვს ყველა ის მკურნალობა, რაც მას სჭირდება და არ არსებობს იმის საპირისპირო მკურნალობა, რასაც ის საჭიროებს. ის, რომ მას აქვს იმის შესაძლებლობა რევოლუციებზე იფიქროს, ალბათ, ადასტურებს იმას, რომ მას ამის გონებრივი და ფიზიკური შესაძლებლობებიც აქვს“, – განაცხადა წულუკიანმა.