პარლამენტის საპროცედურო საკითხთა კომიტეტის თავმჯდომარის, ირაკლი ქადაგიშვილის თქმით, კარგი იქნება, თუ თავად უკრაინელები მიხვდებიან, რომ არახამიას მსგავსი განცხადებები ურთიერთობებს აზიანებს.
„ჩვენ არაფერი აღარ უნდა გავაკეთოთ, ჩვენ არაფერი გვაქვს გასაკეთებელი. ალბათ კარგი იქნება, თუკი თავად უკრაინელები მიხვდებიან, რომ ასეთი ტიპის განცხადებები ორ ქვეყანას შორის ურთიერთობებს აზიანებს. საქართველო უკრაინასთან ურთიერთობაში არის მართალი და გულწრფელი“, – აღნიშნა ირაკლი ქადაგიშვილმა.
ირაკლი ქადაგიშვილს ჟურნალისტებმა ასევე სთხოვეს, შეეფასებინა დავით არახამიას განცხადება საქართველოში უკრაინის ელჩის დაბრუნებასთან დაკავშირებით, რომლის მიხედვითაც, საკითხზე საუბარი შესაძლოა, დაიწყოს მხოლოდ იმ შემთხვევაში, თუ ქვეყანა რუსეთის წინააღმდეგ დაწესებულ სანქციებს შეუერთდება და პრეზიდენტ ზელენსკის მიეცემა შესაძლებლობა, საქართველოს პარლამენტს მიმართოს.
„საერთოდ, მეგობრობას ჰქვია ორმხრივი ურთიერთობა. როდესაც მეორე მხარე შენ უსაფუძვლოდ გადანაშაულებს ძალიან მძიმე ცოდვებში, რომელიც ბუნებაში არ არსებობს და ამ უსაფუძვლო ბრალდებებს ბოლო არ უჩანს, მგონი, ის გაგრძელება, რაც შემდგომ არახამიასთან დაკავშირებით მოაყოლეთ, უკვე ცოტა უტიფრობაა“, – განაცხადა ქადაგიშვილმა.
რაც შეეხება არახამიას განცხადების კიდევ ერთ ნაწილს, სადაც ის მიხეილ სააკაშვილის უკრაინაში დაბრუნებასთან დაკავშირებით საუბრობს და ამბობს, რომ ეს საკითხი წყდება არა საქართველოში, არამედ კრემლში, ქადაგიშვილმა განაცხადა:
„არახამიას საკმაოდ კარგი კავშირები ჰქონდა რუსეთთან, მათ შორის პასპორტი ჰქონდა რუსეთის. მის მიერ თანამდებობებზე დანიშნულ ადამიანებს, მათ შორის ძალოვან სტრუქტურებში, რუსული პასპორტები ჰქონდათ, რასთან დაკავშირებითაც სხვადასხვა დროს რადაში დიდი აჟიოტაჟი იყო. ეტყობა, მან კრემლის მუშაობის სტილი კარგად იცის. ამიტომ ჩვენ ნურაფერს დაგვაბრალებს“, -განაცხადა ირაკლი ქადაგიშვილმა.