„ერთიანი ნაციონალური მოძრაობის“ თავმჯდომარემ ნიკა მელიამ „ფეისბუკ“-LIVE-ში უპასუხა მოქალაქეების შეკითხვებს. ერთ-ერთი შეკითხვა შეეხებოდა, საქართველოს თავდაცვის ყოფილ მინისტრ დავით კეზერაშვილთან თანამშრომლობას. როგორც მელიამ განაცხადა, ბოლოს ორი კვირის წინ შეხვდა კეზერაშვილს და აპირებს მასთან თანამშრომლობას.
ნიკა მელიამ გაიხსენა კეზერაშვილთან პირველი შეხვედრაც, რომელიც ციხიდან მისი გათავისუფლების შემდეგ შედგა.
„დათო კეზერაშვილთან დაკავშირებით ჩემი საჯარო პოზიცია მოუსმენია ბევრს, ეს იყო 2017 წელი. მაშინ, რა თქმა უნდა, ბევრი კითხვა მქონდა, მას მე არ ვიცნობდი. ციხიდან გამოსვლის შემდეგ (შარშან 10 მაისს ხომ გამათავისუფლეს ევროკავშირის მიერ გადახდილი გირაოს შედეგად), გახსოვთ, მიხეილ სააკაშვილი მოვინახულე. კიევიდან მაშინ სხვა ქვეყანაში გავემგზავრე, სადაც დათო კეზერაშვილი პირადად ვნახე და გავიცანი. შედგა ჩვენს შორის საუბარი. ყველა იმ კითხვასთან დაკავშირებით, რომელიც მე მაწუხებდა, მივიღე ჩემთვის დამაკმაყოფილებელი პასუხი, რამაც ნამდვილად გამახარა. მით უმეტეს, მას შემდეგ, რაც ჩემი პოზიცია იყო დაფიქსირებული საჯაროდ. ამ ადამიანმა ისედაც, ისეთი ნაბიჯები გადადგა, რომელიც ამ ქვეყნის დემოკრატიულ წეს-წყობილებას კიდევ უფრო ხელს შეუწყობს მომავალში, ვიდრე ახლა უწყობს – დამოუკიდებელი ტელეკომპანია „ფორმულა“ ჩამოაყალიბა.
ცხადი იყო, რომ ჩემი სხვადასხვა დამოკიდებულება ამ ადამიანის მიმართ აწმყოში იყო სხვაგვარი და მცდარი, მაგრამ ამის მიღმა წარსულში ქექვას არ ვაპირებ. მქონდა ის პოზიცია, რომელიც მქონდა, მაგრამ ყველა ის ადამიანი, რომელიც დღეს ბიძინა ივანიშვილის რეჟიმის წინააღმდეგ იბრძვის, ჩემთვის არის მისაღები“, – თქვა მელიამ.
ოპოზიციური პარტიის თავმჯდომარემ აღნიშნა, რომ გეგმავს კეზერაშვილთან თანამშრომლობას.
„კიბატონო, ორი კვირის წინათაც ვიყავი [კეზერაშვილთან შეხვედრაზე], სამჯერ შევხვდი სულ და არ დაგიმალავთ, დიახაც, ვაპირებ პარტნიორობას მასთან. ვაპირებ მე პირადად პარტნიორობას, სანამ ეს სისაძაგლე „ქართული ოცნების“ სახით არ დასრულდება.
აბა მას ჰკითხეთ, ჩემ მიერ საჯაროთ დაფიქსირებული პოზიციის შემდეგ, რამდენად მოხარული იყო ჩემთვის ხელის ჩამორთმევით. მერწმუნეთ, ეს მისთვის ადვილი არ ყოფილა. ნამდვილად ვაფასებ, ყველაფერს, რომ თავი დავანებოთ, ამიტომაც“, – თქვა მან.