ამ ყველაფრის ერთადერთი ლოგიკური ახსნა არის ის, რომ მის გარემოცვაში არიან ადამიანები, რომლებსაც პირდაპირი ინტერესი აქვთ: ერთი, რომ უკრაინასა და საქართველოს შორის არ იყოს კარგი ურთიერთობა და მეორე – რუსული აგრესია გამოიყენონ, რომ საქართველოში იყოს არეულობა და რამენაირად ჩაითრიონ ამ ომში, – ამის შესახებ საპარლამენტო უმრავლესობის წევრმა რატი იონათამიშვილმა ვოლოდიმირ ზელენსკის განცხადების შეფასებისას განაცხადა.
„მთლიანად რეგიონში საქართველო უკრაინის ყველაზე აქტიური მხარდამჭერია. მათ შორის, საგარეო მხარდაჭერას აქვს კიდევ უფრო კრიტიკულად მნიშვნელოვანი როლი, ვიდრე ჰუმანიტარულს და აქაც საქართველო ერთ-ერთი გამორჩეულია. როდესაც ამ ყველაფრის გამო, ერთ ქვეყანას უწუნებ მხარდაჭერას და მეორეს მადლობას ეუბნები, გაცილებით ნაკლები მხარდაჭერის პირობებში, ეს ნამდვილად არათანმიმდევრულია, რბილად რომ ვთქვათ“, – განაცხადა იონათამიშვილმა.
„აზერბაიჯანისთვის რთულია შეიარაღებით დაეხმაროს უკრაინას, რადგან მათ აქვთ მთიანი ყარაბაღი, ასევე, გეტყვით, რომ აზერბაიჯანი არის ერთ-ერთი იმ ძალიან ცოტა ქვეყანას შორის, რომელთა ნეიტრალურობის ბალანსი ჩვენთვის გასაგებია“, – განაცხადა ზელენკიმ.