ევროკავშირი უზრუნველყოფს, რომ გაზპრომის გადაწყვეტილებამ შეწყვიტოს გაზის მიწოდება პოლონეთსა და ბულგარეთში, მინიმალური გავლენა მოახდინოს ევროპელ მომხმარებლებზე, – ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.
მისი თქმით, ევროკავშირის პასუხი „გაზპრომის“ ქმედებებზე იქნება „მყისიერი, ერთიანი და კოორდინირებული“.
ამასთან, როგორც მან აღნიშნა, პოლონეთი და ბულგარეთი უკვე იღებენ გაზს მეზობელი ევროკავშირის ქვეყნებიდან.
„ევროკომისია ასევე იმუშავებს ევროკავშირის ქვეყნების რეგიონალურ ჯგუფებთან, სადაც ქვეყნებს შეუძლიათ დაუყოვნებლივ დაეხმარონ ერთმანეთს მიწოდების შეფერხების შემთხვევაში. ევროკომისია ასევე მუშაობს REPowerEU გეგმაზე, რომელმაც 2022 წელს რუსეთიდან წიაღისეულ საწვავზე დამოკიდებულება „მნიშვნელოვნად უნდა შეამციროს“. ეს გეგმა მაისის შუა რიცხვებში იქნება წარმოდგენილი.
ევროკავშირი სამუდამოდ უარს იტყვის რუსეთის ფედერაციის წიაღისეული ენერგიის წყაროებზე.
დღეს კრემლმა კიდევ ერთხელ ვერ შეძლო ევროკავშირის ქვეყნებს შორის განხეთქილების დათესვა. ევროპაში რუსული წიაღისეული საწვავის ეპოქა დასასრულს უახლოვდება. გაზის მიწოდების შეწყვეტა არის ნაბიჯი, რომლითაც რუსეთი საკუთარ თავს აყენებს ზიანს“, – განაცხადა ევროკომისიის პრეზიდენტმა.
შეგახსენებთ, რომ რუსეთმა პოლონეთსა და ბულგარეთს გაზის მიწოდება შეუწყვიტა.