უკრაინის 36-ე საზღვაო ქვეითი ბრიგადის მეთაურმა სერგეი ვოლინამ თურქეთის პრეზიდენტ რეჯეფ თაიფ ერდოღანს მიმართა და სთხოვა, გამოიყენოს „გაყვანის“ პროცედურა.
უკრაინული მედიის ცნობით, ვოლინამ აღნიშნული მიმართვა თურქული ტელეკომპანიის ეთერით გააკეთა.
„ბატონო პრეზიდენტო, რეჯეფ თაიფ ერდოღანო, საზღვაო ქვეითთა კორპუსის მაიორი სერგეი ვოლინა მოგმართავთ. ახლა მე ვასრულებ მოვალეობას 36-ე საზღვაო ქვეით ბრიგადაში, რომელიც მარიუპოლის გარნიზონშია და 65 დღეა, იბრძვის ალყაში. ჩვენთან არის 600 სამხედრო მოსამსახურე, რომლებსაც აქვთ სხვადასხვა ხარისხის ჭრილობები და რომლებსაც ნამდვილად სჭირდებათ დახმარება. ჩვენთან ერთად არიან მშვიდობიანი მოქალაქეები, რომლებიც დაშავებული არიან და რომლებსაც ასევე სჭირდებათ თქვენი დახმარება. ჩვენთან ერთად ობიექტზე ასობით მშვიდობიანი მოქალაქე და ათობით ბავშვი ეძებენ უსაფრთხოებას. ყველაზე პატარა ოთხი თვისაა. ახლა მივმართავ თურქ ხალხს, ბატონ პრეზიდენტს, გამოიყენოს ჩვენი „გამოყვანის“ პროცედურა. ყველაფერი გააკეოს, რათა მარიუპოლის გარნიზონი თურქეთში გაიყვანოს, თურქული მხარის უსაფრთხოების გარანტიებით „აზოვსტალიდან“ გაგვიყვანოს. თქვენი დახმარების იმედი გვაქვს“, – აღნიშნა ვოლინამ.
ვოლინამ აქვე დაამატა, რომ „აზოვსტალში“ ძალიან რთული მდგომარეობაა და ბრძოლა არ წყდება.