კიევის ოლქის პოლიცია იტყობინება, რომ აღმოაჩინა ახალი საფლავი ბუჩის მახლობლად – ტყეში, სოფელ მიროცკოესთან ახლოს. საერთო საფლავში იყო სამი მამაკაცის გვამი. მათ ხელები შეკრული ჰქონდათ და თვალები – ახვეული. როგორც საოლქო პოლიციის უფროსმა, ანდრეი ნებიტოვმა, აღნიშნა, ცხედრებს წამების ნიშნები აღენიშნებოდათ, ისევე როგორც ცეცხლსასროლი იარაღით მიყენებული ჭრილობები სხეულის სხვადასხვა ნაწილში. ისინი ყურში გასროლით იყვნენ მოკლულები. მათ ვინაობას ადგენენ. “მსხვერპლთ ხანგრძლივი დროის განმავლობაში აწამებდნენ, ნატყვიარები აღმოჩენილი იყო კიდურებზე. ბოლოს, თითოეული მათგანი ყურში გასროლით მოკლეს”, თქვა ნებიტოვმა, თავის განცხადებაში. დასაფლავების დროის და რიგი სხვა გარემოებების მიხედვით, მამაკაცები რუსი სამხედროების მიერ იყვნენ მოკლული იმ პერიოდში, როცა ისინი კიევთან იმყოფებოდნენ.
ეს ერთ-ერთია იმ მრავალრიცხოვანი საფლავებიდან, რომლებიც კიევის ოლქში ნახეს მას შემდეგ, რაც ის რუსეთი ჯარებმა დატოვეს. რუსეთი უარყოფს თავისი სამხედროების მონაწილეობას ამ დანაშაულებში ბუჩაში, ბოროდიანკასა და კიევის მახლობლად მყოფ სხვა ქალაქებში და ამ ცნობებს “ფეიკს” უწოდებს.
მთლიანობაში, უკრაინული ხელისუფლების თანახმად, კიევის ოლქის ტერიტორიაზე აღმოჩენილია 1200-ზე მეტი მშვიდობიანი მოქალაქის გვამი, რომლებიც რუსული ოკუპაციის დრო დაიღუპნენ.
ბუჩა მსოფლიო მედიის ყურადღების ცენტრში მოხვდა, როცა აპრილის დასაწყისში, მას შემდეგ, რაც იქიდან რუსული ჯარები გავიდნენ ერთთვიანი ოკუპაციის შემდეგ, ათობით სამოქალაქო ტანსაცმელში ჩაცმული ცხედარი იქნა ნაპოვნი, რომელთაგან ზოგიერთს ხელები ჰქონდა შეკრული. მას შემდეგ სულ უფრო და უფრო მეტი ცხედარი იქნა ნაპოვნი იქ და გარშემო ქალაქებსა და სოფლებში. კიევის პოლიციამ შაბათს დაღუპულთა რიცხვი გამოაცხადა, მთლიანობაში – 1202.