„ვგმობთ რუსეთის მასშტაბურ აგრესიას უკრაინის წინააღმდეგ, რაც საერთაშორისო კანონმდებლობისა და გაეროს ქარტიის ნათელი და უხეში დარღვევაა. შედეგი განსაზღვრავს ევროუსაფრთხოებას და ამ რეგიონის უსაფრთხოებას შეუქმნის საფუძველს“, – ამ სიტყვებით დაიწყო საქართველოს პრემიერ-მინისტრმა პოლონეთში, საერთაშორისო კონფერენციაზე სიტყვით გამოსვლა.
ირაკლი ღარიბაშვილმა ხაზი გაუსვა, რომ საქართველო კვლავაც გააგრძელებს უკრაინელი ხალხის დახმარებას.
„მნიშვნელოვანი ჰუმანიტარული კრიზისი შეიქმნა, რომელიც საერთაშორისო თანამეგობრობის მყისიერ დახმარებასა და ქმედებას საჭიროებს. ჩვენ სრულიად სოლიდარულები ვართ უკრაინელი ხალხის, მოვახდენთ ჩვენი რესურსების მობილიზაციას იმისთვის, რომ ამ ქვეყანას დავეხმაროთ. სრული სოლიდარობით ვდგავართ საერთაშორისო საზოგადოების გვერდით და გავაგრძელებთ უკრაინის მხარდაჭერას პოლიტიკურად და ჰუმანიტარულად, მრავალმხრივი და ორმხრივი ფორმატების ფარგლებში. ჩვენ უკვე 7 მილიონი ამერიკული დოლარი გავეცით 28 000 უკრაინელი მოქალაქის დასახმარებლად, რომელიც საქართველოში ცხოვრობს. ასევე, უკრაინის თემატიკით, მოხდა ამ თანხების მობილიზება. ჩვენი მთავრობა ეხმარება დაბინავებაში, სამედიცინო ნივთების, სკოლებისა და ბაღების წვდომის საკითხებში უკრაინელ მოქალაქეებს და სამომავლოდაც გავაგრძელებთ ჩვენი მოძმე ერის დახმარებას“, – აღნიშნა ირაკლი ღარიბაშვილმა.