ყველა ის რეფორმა, რომელსაც ვატარებთ და მომავალში გავატარებთ, იმედს გვაძლევს, რომ საქართველო ძალიან სწორად გაივლის ამ ძალიან მნიშვნელოვან პროცედურას, – ამის შესახებ საქართველოს საგარეო საქმეთა მინისტრმა ილია დარჩიაშვილმა ბრიფინგზე განაცხადა.
მან კომენტარი გააკეთა ევროკავშირის წევრობასთან დაკავშირებით შევსებულ კითხვარზე. მისი თქმით, კითხვარის მომზადების პარალელურად, ინტენსიურად მიმდინარეობდა მუშაობა ევროკავშირის წევრ პარტნიორ სახელმწიფოებთან ყველა მიმართულებით, რათა მათთან მჭიდრო კომუნიკაცია ჰქონოდათ. მინისტრმა აღნიშნა, რომ ამ ეტაპზე ძნელია იმის განსაზღვრა, თუ რა გამოხმაურება ექნება მთავრობას პარტნიორებისგან აღნიშნული კითხვარის პასუხებთან დაკავშირებით.
„ეს პროცესი დღესაც გრძელდება. რა თქმა უნდა, ჩვენი მთავრობისა და ქვეყნის მოლოდინია, რომ საქართველოს ექნება კონკრეტული და ხელშესახები შედეგები აღნიშნულ დოკუმენტზე ჩვენი ევროპელი პარტნიორების მხრიდან, თუმცა რაიმე კონკრეტულზე საუბარი ჩვენგან რთული იქნება. ყველა ის რეფორმა, რომელსაც ვატარებთ და მომავალში გავატარებთ, იმედს გვაძლევს, რომ საქართველო ძალიან სწორად გაივლის ამ ძალიან მნიშვნელოვან პროცედურას“, – განაცხადა დარჩიაშვილმა.