ჩვენი კანონმდებლობა მსჯავრდებული პატიმრის საზღვარგარეთ გაყვანის შესაძლებლობას არ იძლევა. თუ ადამიანი საჭიროებს საზღვარგარეთ გაყვანას სამკურნალოდ ან სხვა მიზნებით, ის არ უნდა იყოს მსჯავრდებული პატიმარი, – ამის შესახებ რატი ბრეგაძემ „იმედის კვირასთან“ ინტერვიუში, მიხეილ სააკაშვილზე საუბრისას განაცხადა.
იუსტიციის მინისტრმა კიდევ ერთხელ განმარტა, რომ სურვილის შემთხვევაში ქვეყნის მესამე პრეზიდენტს საქართველოში სრულფასოვანი მკურნალობისთვის ყველა სერვისი მიეწოდება, თუმცა სააკაშვილი მკურნალობის ნაწილზე უარს აცხადებს და სწორედ რისკების თავიდან აცილების მიზნით გადაიყვანეს სამოქალაქო კლინიკაში.
„ციხეში არავინ შემოდის სამართლებრივი საფუძვლის გარეშე და არც არავინ გადის. მიხეილ სააკაშვილი არის მსჯავრდებული, რომელიც იხდის სასჯელს საქართველოში, პენიტენციურ დაწესებულებაში და არც კანონმდებლობა და არც პრაქტიკა მსჯავრდებული პატიმრის საზღვარგარეთ გაყვანის შესაძლებლობას არ იცნობს“, – განაცხადა ბრეგაძემ.