არაბუნებრივია, უკრაინის ელჩი გაწვეული იყოს საქართველოდან, როცა პრემიერი და ყველა, უკრაინას მოვიხსენიებთ როგორც სტრატეგიულ პარტნიორს. როგორ შეიძლება სტრატეგიულ პარტნიორს ქვეყანაში არ ჰყავდეს ელჩი, – ამის შესახებ პარტია „მოქალაქეების“ წევრმა, პარლამენტის თავმჯდომარის მოადგილემ, ლევან იოსელიანმა „ქრონიკაში“ განაცხადა.
„ვისურვებდი, პრემიერ-მინისტრი უკრაინაში ჩავიდეს და პერსონალურად შეძლოს გაფუჭებული ურთიერთობის გამოსწორება, რომელიც დღეს არსებობს. უკრაინა დღეს ომში იმყოფება, შეიძლება რაღაცები დღეს არ მოგვწონდეს, მაგრამ ვფიქრობ მაქსიმალურად თავშეკავება და წინდახედულობა გვმართებს. დასრულდება ომი და ყველას ექნება საშუალება ეს ურთიერთობა გაარკვიოს. დღეს მთავარია, ჩვენ შევძლოთ ამ ურთიერთობის გამოსწორება. ყოველთვის ვამბობდი, რომ საგარეო მიმართებით საქართველო ყოველთვის სწორი პოზიცია უკავია, ამ მიმართულებით არასდროს გამიკრიტიკებია ჩემი კოლეგები „ქართული ოცნებიდან“, რადგან ვხედავ, ისინი რას აკეთებენ“, – განაცხადა ლევან იოსელიანმა.