ჩვენ გვიყურებენ პატიმრები, რომლებმაც უნდა იცოდნენ და დარწმუნებული იყვნენ, მივცე მათ სრული გარანტია, რომ არასოდეს გაიგებენ ხელ-კეტის, დაკაკუნების ხმას კარზე, რაც მათთვის წამების მომასწავებელი იყო, – ამის შესახებ საქართველოს იუსტიციის მინისტრმა რატი ბრეგაძემ პარლამენტის სხდომაზე ინტერპელაციის წესით გამოსვლისას ისაუბრა.
მან ასევე მიმართა ოპოზიციას და აღნიშნა, რომ მათ საშუალება აქვთ, გამოიყენონ სადეპუტატო უფლებამოსილება და სააკაშვილის გარდა, სხვა პატიმრებიც მოინახულონ ან ციხეში არსებულ სიტუაციას გაეცნონ.
„გულწრფელად მოხარული ვიყავი, რომ ინტერპელაცია ინიშნებოდა, რადგან ჩვენ ნამდვილად გვაქვს ძალიან ბევრი სასაუბრო. თუმცა, ისიც გითხარით, რომ იდეალურობას არ ვამტკიცებთ, პირიქით, ყოველთვის ვეძებთ ახალ გამოწვევებს, რომ მას ვუპასუხოთ. საბოლოო ჯამში აღმოჩნდა, რომ თქვენ საერთოდ არ გაინტერესებთ არც ერთი პატიმრის ბედი, გარდა ერთი ადამიანისა. შეიძლება, კიდევ რამდენიმესი. ერთი კითხვაც არ დაგისვამთ სხვა პატიმრებთან დაკავშირებით. გვიყურებენ მათ შორის პატიმრები, რომლებიც ტელევიზორის საშუალებით ადევნებენ თვალყურს დღევანდელ სხდომას. გულწრეფალად ვწუხვარ, რომ სწორედ თქვენ შეეცადეთ, არ გვესაუბრა და არ გაეგოთ ის მიმდინარე რეფორმები, რომლებიც ხორციელდება. ვფიქრობ, შეგიძლიათ, მათ შორის თქვენი სადეპუტატო უფლებამოსილება იმაშიც გამოიყენოთ, რომ სხვა ადამიანებიც მოინახულოთ, ან ზოგადად ციხეში არსებულ სიტუაციას გაეცნოთ. ამ ყველაფრით თქვენ ნათლად დაანახეთ საზოგადოებას, რომ არა „ქართული ოცნების“ ოპოზიცია, არამედ საქართველოს ოპოზიცია ხართ. ერთი სხვა პატიმრის ბედიც არ მოიკითხეთ. კარგად დაინახა საზოგადოებამ, რომ თქვენ საერთოდ არ გაინტერესებთ პატიმრის ბედი. ჩვენ გვიყურებენ პატიმრები, რომლებმაც უნდა იცოდნენ და დარწმუნებული იყვნენ, მივცე მათ სრული გარანტია, რომ არასოდეს გაიგებენ ხელ-კეტის დაკაკუნების ხმას კარზე, რაც მათთვის იყო წამების მომასწავებელი. ამ ხმას არასოდეს გაიგებს არც ერთი პატიმარი“, – განაცხადა რატი ბრეგაძემ.