უმჯობესი იქნება, საქართველოს პრეზიდენტმა საკუთარ ხალხს აუხსნას, რას ნიშნავს ქვეყნის მიერ მეორე ქვეყნიდან ელჩის გაწვევა მაშინ, როცა უკრაინას არც ერთი სხვა ქვეყნიდან ელჩი არ გაუწვევია, – ამის შესახებ საპარლამენტო უმრავლესობის წევრი ალუდა ღუდუშაურმა განაცხადა.
მისი თქმით, თუ სალომე ზურაბიშვილი სიღრმისეულად შეხედავს სურათს, ძნელი დასანახი არ უნდა იყოს, რომ საქართველოში არიან პოლიტიკური ჯგუფის წარმომადგენლები, ვისთვისაც მნიშვნელოვანია, ქვეყანა ჩართული იყოს საომარ მოქმედებებში.
„ის, ვინც სალომე ზურაბიშვილს პრეზიდენტად არ მოიხსენიებდა და შეურაცხყოფის ქვეშ ამყოფებდნენ, ახლა, რატომღაც, ეს ადამიანები სხვა ნოტებზე საუბრობენ. უფლება დამიტოვეთ, რომ პრეზიდენტს რიგ საკითხებში არ დავეთანხმო. დიახ, დემოკრატია ის არის, რომ პრეზიდენტს ცალკეულ საკითხებზე თავის შეფასებები აქვს და ჩვენი შეფასებები განსხვავებულია. ობიექტური რეალობაა ის, რასაც ჩვენ ვამბობთ. თუ პრეზიდენტი კარგად და სიღრმისეულად შეხედავს სურათს, ვფიქრობ, ძნელი დასანახი არ უნდა იყოს, რომ ქვეყანაში არიან პოლიტიკური ჯგუფის წარმომადგენლები, ვისთვისაც მნიშვნელოვანია, ქვეყანა ჩართული იყოს საომარ მოქმედებებში, საქართველოში მოეწყოს მეორე ბუჩა და მეორე ფრონტი გაიხსნას“, – განაცხადა დეპუტატმა.
მისივე თქმით, პრეზიდენტმა ზურაბიშვილმა კარგად იცის დემოკრატიის არსი, მნიშვნელობა და ის, რომ სასამართლოს წინააღმდეგ გახსნილი ორკესტრირებული ცეცხლი და შტურმი არ არის დემოკრატია.
„სასამართლოს სჭირდება დაცვა და დამოუკიდებლობის ძალიან მაღალი ხარისხი, რაც აქვს დღეს. რაც შეეხება უკრაინას და ზელენსკის, უმჯობესი იქნება პრეზიდენტმა, როგორც ყოფილმა დიპლომატმა საკუთარ ხალხს აუხსნას და განმარტებები გააკეთოს, თუ რას ნიშნავს ქვეყნის მიერ მეორე ქვეყნიდან ელჩის გაწვევა მაშინ, როცა არც ერთი სხვა ქვეყნიდან ელჩი არ ჰყოლია გაწვეული, მათ დორის იმ ქვეყნებიდანაც კი, საიდანაც პირდაპირ ცეცხლი მიემართებოდა უკრაინის მისამართით. გაუგებარი და მცდარი გადაწყვეტილების ფონზე, ქვეყნიდან რომ გაგყავს ელჩი, ეს ნაბიჯი რამდენად არის მეგობრული, კონსტრუქციული? – ჩვენ ჩვენი შესაძლებლობების მაქსიმუმი გავაკეთეთ და მოწინავეები ვართ. როცა ამ ფონზე პრეზიდენტი გვიწუნებს და ამბობს, თურმე, რატომ არ ჩავრთეთ ზელენსკი, უმჯობესია ვითარება სრულად წარმოადგინოს. შეფასებები იმასთან დაკავშირებით, რომ თითქოს, ზრდილობის ხარისხზე გვაქვს რაიმე პრობლემა, ეს არის პრეზიდენტის აზრი და მას აქვს საკუთარი აზრის გახმოვანების უფლება, მაგრამ ეს შეფასებები არის სუბიექტური და როცა ჩვენ ვაკეთებთ პრინციპულ განცხადებებს, რომლის მიზანია ჩვენი ხალხის გაძლიერება და ამას ვინმე ეძახის ზრდილობის ნაკლებობას, ეს მისი პრობლემაა. ყველას ვპირდები, არც ერთი ნაბიჯი ქვეყნის საზიანოდ უკან არ იქნება“, – განაცხადა ალუდა ღუდუშაურმა.