საქართველოს პარლამენტის ევროპასთან ინტეგრაციის კომიტეტის თავმჯდომარე, სამუშაო ვიზიტით, ნიდერლანდების სამეფოს ეწვია. როგორც მან „ქრონიკასთან“ საუბრისას განაცხადა, ახლა საქართველოსთვის მნიშვნელოვანი მომენტია – ქვეყანა კანდიდატუსის სტატუსთან დაკავშირებით, გადაწყვეტილებას ელის და ევროპარლამენტში ჩანიშნული დებატები, დიდწილად, ევროკავშირის გადაწყვეტილებაზე დიდ გავლენას ვერ იქონიებს.
„ევროპარლამენტს უფლება აქვს, თავად განსაზღვროს, თუ რა საკითხს აირჩევს გარჩევისთვის. როდესაც საქართველო ელოდება ევროკავშირის მხრიდან ძალიან მნიშვნელოვან გადაწყვეტილებას, მსგავსი საკითხების წამოჭრა ნამდვილად არ იყო ჩვენს ინტერესებში და ნამდვილად არ ემსახურება კარგი დამოკიდებულების შექმნას საქართველოს მიმართ. ჩვენ ინტენსიური კავშირი გვაქვს პარტნიორებთან, ევროპარლამენტარ მეგობრებთან, რომლებიც ასევე იზიარებენ ამ მოსაზრებას. ეს დებატები, რომლებიც, სამწუხაროდ, ზუსტად ამ დროსაა ინიცირებული, არ ემსახურება საქართველოს დიდ ინტერესებს, რომელმაც შეიძლება, ხელი შეუწყოს ჩვენს ქვეყანას პოზიტიური იმიჯისა და პოზიტიური გადაწყვეტილების მიღებაში. დებატები ხვალ შედგება და ჩვენ ამ დებატებს ძალიან ყურადღებით მოვისმენთ. ისიც უნდა აღინიშნოს, რომ, დიდწილად, ამ დებატებს გავლენა ვერ ექნება იმ გადაწყვეტილებაზე, რომელიც ევროკავშირმა თვის ბოლოს უნდა მიიღოს და ვერც ევროკომისიის დასკვნაზე, რომელსაც კითხვარზე საპასუხოდ ამზადებენ და ველოდებით მომავალ კვირას, – აცხადებს მაკა ბოჭორიშვილი.
ევროპარლამენტში დებატები სახელწოდებით „მედია თავისუფლების დარღვევა და ჟურნალისტთა უსაფრთხოება საქართველოში“ ხვალ საღამოს შედგება. ხუთშაბათს კი, ანალოგიური სახელწოდებით რეზოლუციაზე კენჭისყრა იგეგმება.