ოპოზიციის გარკვეული ნაწილის პოზიცია ჩემთვის გასაკვირია. ეს არის ან გარკვეული თვითგვემის პოზა, რომ ქართველები ყველაზე ცუდები ვართ და ჩამოვრჩებით ვინმეს, ან ეს არის ფარული სურვილი, რომ საქართველომ არ მიიღოს კანდიდატობის სტატუსი და პროგრესი არ ჰქონდეს. აქ ხედავენ ბოლო შანსს, რომ რამენაირად არეულობა მოაწყონ ამ ქვეყანაში, – ამის შესახებ საქართველოს პარლამენტის თავმჯდომარემ, შალვა პაპუაშვილმა „იმედი LIVE“-ში ისაუბრა.
„არა მხოლოდ ემოციურად, ფაქტობრივად, ბრიუსელში განთავსებული ინსტიტუტების კვლევებით დასტურდება, რომ საქართველო ასოცირებულ ტრიოში, ანუ უკრაინა-მოლდოვასთან შედარებით, არის ლიდერი აბსოლუტურად ყველა პარამეტრში, როგორც კანონის უზენაესობის კუთხით, ისე სხვა მიმართულებით. ასოცირების შეთანხმების შესრულების კუთხით საქართველო არსებულ კანდიდატებსაც კი უსწრებს, ევროკავშირის წევრ ზოგ ქვეყანასაც კი უსწრებს. ოპოზიცია გაწაფულია რომ ნეგატიური აღქმები შექმნას. სამწუხაროდ, თანამედროვე სოცმედია ამის ბევრ ინსტრუმენტს იძლევა, მაგრამ სწორედ ფატებზე დაფუძნებით ა დამსახურებით თუ მიიღებს ევროკავშირი გადაწყვეტილებას, საქართველოს კანდიდატის სტატუსი ნამდვილად ეკუთვნის. ახლა თავად ევროპაც გზაგასაყარზეა. ახლა ევროპამ უნდა გადაწყვიტოს, რამდენად სურს ის, რომ გრძელვადიანად აჩვენოს თავისი ინტერესი ჩვენი რეგიონის მიმართ, აჩვენოს სოლიდარობა ჩვენი ხალხის მიმართ და გააგზავნოს მკაფიო სიგნალი რუსეთის მიმართ“, – განაცხადა შალვა პაპუაშვილმა.