უკრაინა ევროპულ მხარდაჭერას იღებს, თუმცა აგრესორის თავდასხმების მოგერიება ამ დრომდე უწევს. რუსული აგრესიის 115-ე დღეს ოკუპანტი ქვეყნის აღმოსავლეთით პოზიციების გამყარებას ცდილობს, მაგრამ წინ წასვლას ვერ ახერხებს. აგრესორი სამოქალაქო ინფრასტრუქტურას მიზანმიმართულად ანადგურებს, ბომბებს კი მშვიდობიანი მოქალაქეები ეწირებიან. რუსეთის მიერ საარტილერიო დაბომბვების შედეგად 4 მშვიდობიანი მოქალაქე დაიღუპა და 6 დაშავდა დონეცკის ოლქში, ინფორმაციას გუბერნატორი ავრცელებს.
რუსეთი განაგრძობს ძალისხმევის ფოკუსირებას სევეროდონეცკისა და ბახმუტის მიმართულებებზე. სევეროდონეცკის მიმართულებით გრძელდება სროლა საარტილერიო და სარაკეტო ყუმბარმტყორცნიდან – უკრაინული ჯარის პოზიციების მიმართულებით. იბომბება სამოქალაქო ინფრასტრუქტურა. ბრძოლა ქალაქ სევეროდონეცკისთვის გრძელდება. ტაქტიკური მდგომარეობის გასაუმჯობესებლად რუსული ქვედანაყოფები უშედეგოდ ცდილობენ თავდასხმის ოპერაციების განხორციელებას. გასული 24 საათის განმავლობაში უკრაინის თავდაცვის ძალების ნაწილებმა გაანადგურეს მოწინააღმდეგის მინიმუმ 30 ერთეული სხვადასხვა სახის ტექნიკა და იარაღი.
დღესვე უკრაინის პროკურატურამ გაავრცელა ინფორმაცია დაღუპულთა და დაშავებულთა შესახებ, მათ შორის საუბარია ბავშვებზეც. ბოლო ინფორმაციით, რუსეთის უკრაინაში შეჭრის შედეგად გარდაცვლილია 323 ბავშვი და დაშავებულია 583, თუმცა ეს არ არის სრული სტატისტიკა, რადგან უცნობია ამ მხრივ ოკუპირებულ ზონებში არსებული ვითარება.