უკრაინის ეროვნული უსაფრთხოების და თავდაცვის საბჭოს მდივანმა ოლექსეი დანილოვმა LIGA.net-თან ინტერვიუში ვოლოდიმირ ზელენსკის ადმინისტრაციის უფროსის მრჩეველი მიხაილ პოდოლიაკი და პარტია „ხალხის მსახურის“ ერთ-ერთი ლიდერი დავით არახამია გააკრიტიკა.
ჟურნალისტის კითხვაზე, რომელიც ეხებოდა პოდოლიაკის განცხადებას იმის თაობაზე, თუ რა რაოდენობის ტექნიკა სჭირდება უკრაინას პარიტეტისთვის, დანილოვმა განაცხადა, რომ არ ესმის, რატომ აკეთებს პოდოლიაკი ასეთ განცხადებებს.
„პოდოლიაკი გენშტაბის წარმომადგენელია? მე ის მხოლოდ იანუკოვიჩთან, კუნძებზე მინახავს. არ მესმის, რატომ იქცა ის ახლა ჯარის ხმად. ასეთ თემებზე უნდა ისაუბრონ უკრაინის შეიარაღებული ძალების მთავარსარდალმა ვალერი ზალუჟნიმ, გენშტაბის უფროსმა სერგეი შაპტალამ და თავდაცვის მინისტრმა. სამხედროებმა იციან საკუთარი ტაქტიკა და ძალები. ჩვენ მათ ვენდობით, ისინი პროფესიონალები არიან და პასუხისმგებლობას იღებენ ამაზე“, – განაცხადა დანილოვმა.
ის ასევე გამოეხმაურა დავით არახამიას განცხადებას, რომელმაც თქვა, რომ ყოველდღიურად ფრონტზე 1000 უკრაინელი ჯარისკაცი იღუპება.
„მინდა მივმართო მოღვაწეებს, რომლებიც აცხადებენ, რომ ყოველდღიურად 200, 300 და მეტი მსხვერპლი გვყავს. ზოგიერთმა საერთოდ 1000 დაასახელა. მათ ასეთი ინფორმაციის მიღების საშუალებაც კი არ აქვთ. როდესაც საუბარია გარდაცვლილებზე, ასეთი რამის გაკეთება არ შეიძლება. ამით ჟონგლიორობა არ შეიძლება. ეს არაა ცირკი, ეს ადამიანების სიცოცხლეს ეხება“, – განაცხადა დანილოვმა.