მოდით, შევუწვიტოთ ჟანგბადის მიწოდება რუსეთის ომის მანქანას, – ამის შესახებ განცხადება ევროპული საბჭოს პრეზიდენტმა, შარლ მიშელმა გერმანიაში „დიდი შვიდეულის“ სამიტის დაწყების წინ გამართულ პრესკონფერენციაზე გააკეთა.
მისივე თქმით, რუსეთის ომმა უკრაინაში მთელი მსოფლიო საფრთხის წინაშე დააყენა.
ამასთან, მიშელი აცხადებს, რომ „დიდი შვიდეული“ და ევროკავშირი ერთიანია და მათი მხარდაჭერა უკრაინისადმი ურყევია.
ევროპული საბჭოს პრეზიდენტმა განაცხადა, რომ ევროკავშირი განაგრძობს კიევის ფინანსურ, ჰუმანიტარულ და პოლიტიკურ მხარდაჭერას და დაეხმარება უკრაინას ქვეყნის აღდგენაში. მან ასევე ისაუბრა უკრაინისა და მოლდოვისთვის ევროკავშირის წევრობის კანდიდატის სტატუსის მინიჭებაზე.
„ომი უკრაინაში ევროკავშირსაც გარდაქმნის. სულ რამდენიმე დღის წინ ჩვენ უკანასკნელ სამიტზე ჩვენ შევთანხმდით, რომ უკრაინას და მოლდოვას ევროკავშირის წევრობის კანდიდატის სტატუსს მივანიჭებთ და ასევე მზად ვართ, მივანიჭოთ კანდიდატის სტატუსი ბოსნიას და საქართველოს, როგორც კი რეფორმები შესრულდება. ეს არის ისტორიული მომენტი უკრაინისთვის და ევროპის მომავლისთვის. „დიდი შვიდეულის“ ქვეყნებთან ჩვენ ერთიან მიზნებს ვიზიარებთ, რომ შევუწვიტოთ ჟანგბადის მიწოდება რუსეთის ომის მანქანას, და ასევე ვიზრუნოთ ჩვენი და ჩვენი პარტნიორების ეკონომიკაზე. ევროკავშირი უკრაინელი ხალხის გვერდით იდგება ხანგრძლივად, რომ დაიცვას უკრაინის სუვერენიტეტი და ტერიტორიული მთლიანობა და დავიცვათ ჩვენი დემოკრატიული ღირებულებები“, – განაცხადა შარლ მიშელმა.