“ნატო ალიანსის აღმოსავლეთ ნაწილში თავის საბრძოლო ჯგუფებს გააძლიერებს”

ნატო ალიანსის აღმოსავლეთ ნაწილში თავის საბრძოლო ჯგუფებს ბრიგადის დონემდე გააძლიერებს, – განაცხადა ნატოს გენერალურმა მდივანმა, იენს სტოლტენბერგმა.

„ჩვენ გავზრდით მაღალი მზადყოფნის ძალების რაოდენობას 300 000-მდე“, – აღნიშნა იენს სტოლტენბერგმა ბრიუსელში გამართულ პრესკონფერენციაზე.

ნატოს გენერალური მდივნის თქმით, აღნიშნული მოიცავს წინასწარ განლაგებულ მეტ აღჭურვილობასა და სამხედრო მარაგებს, საჰაერო თავდაცვის გაძლიერებასა და თავდაცვის განახლებულ გეგმებს, წინასწარ დანიშნული ძალებით კონკრეტული მოკავშირეების დასაცავად.

იენს სტოლტენბერგმა ასევე აღნიშნა, რომ ნატოს მადრიდის სამიტი ტრანსფორმაციული იქნება, მრავალი მნიშვნელოვანი გადაწყვეტილებით, მათ შორის უსაფრთხოების შესახებ ახალი სტრატეგიული კონცეფციით.