რუსეთმა უკრაინის კუნძულ ზმეინიდან ჯარისკაცები გაიყვანა, – ამის შესახებ BBC წერს.
„ჩვენ მივეჩვიეთ, რომ რუსეთი ავრცელებს მოვლენების იმ ვერსიას, რომელიც სრულიად განსხვავდება იმისგან, რასაც უკრაინის ან დასავლეთის მთავრობები გვთავაზობენ. მოსკოვს უნდა, გვჯეროდეს, რომ ზმეინიდან რუსეთს უკან არ დაუხევია. რუსეთის თავდაცვის სამინისტროს მიერ გავრცელებულ განცხადებაში აღნიშნულია, რომ იქ მყოფმა რუსულმა ჯარებმა უბრალოდ „ამოცანების“ შესრულება დაასრულეს და წავიდნენ. ასევე, ამას უწოდეს „კეთილგანწყობის ჟესტი“, რათა ეჩვენებინათ, რომ რუსეთი უკრაინიდან საკვების ექსპორტს არ აფერხებდა. „კუნძული ზმეინის სტრატეგიული მნიშვნელობის გათვალისწინებით, სადაც თვეების განმავლობაში იბრძოდნენ, და ასევე, იმის გათვალისწინებით, რომ რუსეთის შეიარაღებული ძალების მიერ უკრაინაში შეჭრის შემდეგ „კეთილგანწყობის ჟესტები“ არ ყოფილა, რუსეთის ფარგლებს გარეთ, მოვლენების ამ ვერსიას ცოტა თუ დაიჯერებს. შეიძლება, ეს უფრო შიდა აუდიტორიისკენ იყოს მიმართული – კრემლს სურს, რუსულმა საზოგადოებამ ორი რამ დაიჯეროს; რომ ამ კონფლიქტში რუსები „კარგი ტიპები“ არიან და რომ უკრაინაში კრემლის ე.წ. „სპეციალური სამხედრო ოპერაცია“ გეგმის მიხედვით მიმდინარეობს“, – წერს BBC-ს ჟურნალისტი.
კუნძულმა ზმეინმა უკრაინაში რუსეთის შეჭრიდან მალევე მიიპყრო მსოფლიო მედიის ყურადღება – სწორედ ამ კუნძულზე ბაზირებულმა უკრაინელმა სამხედროებმა გაუშვეს რუსული სამხედრო ხომალდი ცნობილი მიმართულებით.