კვიპროსში პირბადის ტარების ვალდებულების მოხსნიდან ერთი თვის შემდეგ მათი ტარება კორონავირუსის შემთხვევების ზრდის გამო კვლავ სავალდებულო იქნება, – ინფორმაციას სააგენტო „როიტერი“ ავრცელებს.
ჯანდაცვის მინისტრის განცხადებით, პირბადეების ტარება სავალდებულო იქნება შიდა სივრცეში და ეს შეზღუდვა ძალაში პარასკევს შევა.
ამასთან მედიის ინფორმაციით, აღნიშნული შეზღუდვის დაბრუნებას ჯანდაცვის ექსპერტებმა გაუწიეს რეკომენდაცია, რადგან შეინიშნება ინფექციის ზრდა იმ ადამიანებში, რომლებიც არ იცავენ სათანადო ზომებს.
აღსანიშნავია, რომ კვიპროსმა პირბადეების ტარებასთან დაკავშირებული შეზღუდვა პირველ ივნისს მოხსნა.
როგორც მედია წერს, ქვეყანაში კორონავირუსის შემთხვევების ყოველდღიური სტატისტიკის ნაცვლად ცხადდება ყოველკვირეული მონაცემები. პირველი ივლისის მონაცემებით, ერთ კვირაში ქვეყანაში 10 ათასზე მეტი ახალი შემთხვევა გამოვლინდა.