უკრაინელები კონფლიქტის სამხედრო ფაზის დასრულებას წლის ბოლომდე შეძლებენ და რუსეთს აიძულებენ, რომ დაჯდეს მოლაპარაკებების მაგიდასთან, – ამის შესახებ უკრაინის პრეზიდენტმა, ვლადიმირ ზელენსკიმ CNN-თან ინტერვიუში განაცხადა.
„თუ ჩვენი სახელმწიფო იქნება ერთიანი, როგორიც არის ახლა, თუ მძლავრი იარაღი დროულად მოვა ჩვენი პარტნიორებისგან და თუ იღბალი და ღმერთი ჩვენ გვერდით იქნება, ამ წლის ბოლომდე ბევრს შევძლებთ“, – აღნიშნა ზელენსკიმ.
მისი თქმით, იარაღი, რომელიც უკრაინამ დასავლელი პარტნიორებისგან მიიღო, ფრონტის მთელ ხაზზე დადებით შედეგს იძლევა.
„უკრაინის შეიარაღებულმა ძალებმა მოკლე დროში მნიშვნელოვანი დარტყმა მიაყენეს რუსული არმიის მომარაგების სისტემას და ჩაშალეს მისი ლოჯისტიკა. ნებისმიერი ადგილობრივი გამარჯვება არსებითად მნიშვნელოვანია“, – განაცხადა უკრაინის პრეზიდენტმა.