ბელარუს მოხალისეს კარინა პოტიომკინას უკრაინიდან აძევებენ: მან ფეისბუქის საკუთარ გვერდზე გამოაქვეყნა ფოტო – პასპორტში შესაბამისი ბეჭდით.
დოკუმენტის თანახმად, მან უკრაინის ტერიტორია 15 ივლისამდე უნდა დატოვოს. ის დააჯარიმეს უკრაინაში ყოფნის წესების დარღვევისთვის.
30 ივნისს კარინა პოტიომკინას უკრაინაში მოხალისეობრივი მუშაობისთვის მადლობის სერთიფიკატი გადაეცა. მისი განცხადებით, აქამდე ის უკრაინის ტერიტორიაზე რეგისტრაციის გარეშე იმყოფებოდა, ცხოვრობდა და მუშაობდა ბუჩაში.
თავად გოგონას თქმით, ის „ლეგალურად დარჩა უკრაინის ტერიტორიაზე 180 დღის განმავლობაში”, მაგრამ პოლიტიკური თავშესაფარი არ მოითხოვა.
პოტიომკინა ასევე ამბობს, რომ დარეკა მიგრაციის სამსახურში, სადაც უთხრეს, რომ თავშესაფრის განაცხადს ჯერ არ იღებენ „ქვეყანაში საომარი მდგომარეობის გამო“, თუმცა, ომის დასრულებისთანავე გამოიძახებდნენ.
კარინას თქმით, უკრაინის ხელისუფლებამ მას უარი უთხრა უკრაინაში დროებითი ბინადრობის ნებართვისთვის საჭირო დოკუმენტების მიღებაზე.
მოგვიანებით, მიგრაციის სამსახურის თანამშრომელმა პოტიომკინას პასპორტი ჩამოართვა და აცნობა, რომ ის დაჯარიმდებოდა, თუმცა „მინიმალურად“, რადგან მოხალისე იყო.
უკრაინის მიგრაციის სამსახურში პოტიომკინას გაძევებაზე კომენტარი არ გაუკეთებიათ.