სამგორის რაიონის გამგეობა განცხადებას ავრცელებს და “ტვ პირველს” პასუხობს.
“გვსურს, გამოვეხმაუროთ ტელეკომპანია „პირველის“ ეთერში გასულ სიცრუის შემცველ ინფორმაციას. კერძოდ, გადაცემა „ნოდარ მელაძის შაბათის“ ეთერში გასულ სატელევიზიო მასალას, სადაც საუბარია, რომ თითქოს, სამგორის რაიონის გამგეობაში მოქალაქე ალვინა ვართანიანის მიმართ განხორციელდა ძალადობის შემცველი ქცევა. აღნიშნული ინფორმაცია არის მორიგი სიცრუე, რომელიც საზოგადოების შეცდომაში შეყვანას ისახავს მიზნად.
ალვინა ვართანიანმა და მისი ოჯახის თითოეულმა წევრმა (შვილი, ძმა) არაერთხელ ისარგებლა სოციალური პროგრამით გათვალისწინებული მიზნობრივი ფინანსური დახმარებით. ამავე პიროვნებაზე გამონაკლისის სახით, სამშენებლო მასალის შესაძენად, 2018 წელს გაიცა ფინანსური დახმარება, ჯამში, 7 159 ლარის ოდენობით. მან აღნიშნულ საბიუჯეტო წელს ისარგებლა გამგეობის მიზნობრივი ფინანსური დახმარებითაც – 1 450 ლარის ოდენობით. აღნიშნული მოქალაქე და მისი ოჯახის წევრები ასევე, სარგებლობენ უფასო სასადილოს პროგრამითაც.
ვინაიდან, საბიუჯეტო წლის განმავლობაში სოციალური პროგრამისთვის გარკვეულად განსაზღვრული თანხაა გამოყოფილი (ყველა კატეგორიის დახმარების ჯამური ღირებულება არ უნდა აღემატებოდეს 1500 ლარს), ის თანაბრად ხელმისაწვდომი უნდა იყოს ყველა ბენეფიციარისთვის, რის გამოც, გამგეობა მოკლებულია შესაძლებლობას, ერთსა და იმავე პიროვნების მიმართ გამონაკლისები ყოველწლიურად დაუშვას. სამგორის რაიონის გამგეობა მაღალი პასუხისმგებლობით ეკიდება სოციალურად დაუცველი თითოეული მოქალაქის საჭიროებას. ყოველივე ეს კი ცხადყოფს, რომ ბოლო პერიოდში გარკვეული მედიასაშუალებების მხრიდან სამგორის რაიონის გამგებლისა და გამგეობის თანამშრომლების მიმართ ადგილი აქვს მიზანმიმართულ ცილისმწამებლურ კამპანიას.
კიდევ ერთხელ მივმართავთ მედიის წარმომადგენლებს, ნებისმიერი ინფორმაცია, რაც თბილისის მუნიციპალიტეტს ეხება, გადაამოწმეთ დედაქალაქის მერიის შესაბამისი სამსახურების წარმომადგენლებთან”