„საქართველოს ისტორიული შესაძლებლობა აქვს. მან უნდა გაატაროს საჭირო ზომები, რეფორმები ევროკომისიის შემდეგ ანგარიშამდე. ეს არის დავალება არა მხოლოდ მთავრობისთვის, სხვა პოლიტიკური ძალებისთვის, არამედ სამოქალაქო საზოგადოებისთვის. დასასრულებელია ქვეყნის საარჩევნო კანონმდებლობა, რომელიც შესაბამისობაში უნდა იყოს ოდირის რეკომენდაციებთან“, – ამის შესახებ ევროპარლამენტარმა მარკეტა გრეგოროვამ განაცხადა.
მისივე თქმით, გასატარებელია მართლმსაჯულების არსებითი რეფორმა, ასევე დამოუკიდებელი ანტიკორუფციული სერვისები, რომლებიც ეფექტიანად და მიუკერძოებლად გამოიძიებს ყველა საქმეს და უზრუნველყოფს ნორმებისა და პრინციპების დაცვას.
„ეს არის უმნიშვნელოვანესი ნაწილი კორუფციასთან, დეოლიგარქიზაციასთან და სახელმწიფოს მიტაცებასთან ბრძოლის საქმეში. ჩვენ წლების განმავლობაში ვამბობდით, რომ კანონის უზენაესობასა და დემოკრატიას საქართველოში ჩამორჩენა ჰქონდა. საქართველოს მოქალაქეებმა გამოთქვეს ევროპული მისწრაფებასთან დაკავშირებული სურვილი, ეს დაკავშირებულია დემოკრატიის მაღალი სტანდარტის დაკმაყოფილებასთან, სასამართლოს თავისუფლებასთან და ფუნდამენტურ თავისუფლებებთან. მე მინდა მივმართო საქართველოს ხელისუფლებას, მიუდგნენ ევროკომისიის დავალებას სერიოზულად, გაატარეთ რეფორმები, იმუშავეთ ყველასთან ერთად პარლამენტში და მათ შორის ოპოზიციასთან. ეს არ არის პარტიებისა და ინდივიდუალური პირების, არამედ ეს არის ნამდვილად ისტორიული მომენტი თქვენი ქვეყნისთვის“, – განაცხადა ევროპარლამენტარმა.
ევროპარლამენტის საგარეო ურთიერთობათა კომიტეტმა საქართველოს შესახებ ესტონელი დეპუტატის, სვენ მიქსერის მიერ მომზადებული ანგარიში მოისმინა. მოხსენება ასოცირების ხელშეკრულებით ნაკისრი ვალდებულებების შესრულებას ეხება და საბოლოო სახეს სექტემბერში მიიღებს. დეპუტატებმა ევროპული საბჭოს მიერ მიღებულ გადაწყვეტილებაზე, კანდიდატის სტატუსის მისაღებად საქართველოსთვის წარდგენილი 12 პუნქტის შესრულებაზე ისაუბრეს. მომავალ კვირას კომიტეტი თბილისს ეწვევა.