„როიტერის“ ინფორმაციით, ევროკავშირმა უნგრეთსა და პოლონეთს განუცხადა, რომ ქვეყნებმა უნდა გააუმჯობესონ სასამართლოსა და მედიის დამოუკიდებლობა, ასევე ზომები მიიღონ მექრთამეობის წინააღმდეგ. ევროკავშირში აცხადებენ, რომ ამ ორი ქვეყნისთვის მილიონობით დოლარის დახმარების განბლოკვა სწორედ ამ საკითხების შესრულებაზეა დამოკიდებული, რასაც ორი ქვეყანა ჯერჯერობით არ პასუხობს და რაც იწვევს სერიოზულ შეშფოთებას.
„როიტერი“ წერს, რომ ყურადღება ორ ყოფილ კომუნისტურ ქვეყანაზეა, სადაც ევროსკეპტიკურად განწყობილ მთავრობებს ევროკავშირთან სულ უფრო გამწვავებული ბრძოლა აქვთ მიგრაციის, ადამიანის უფლებათა, გარემოს დაცვისა და დემოკრატიული ღირებულებების გამო.
„რუსეთის ომი უკრაინაში არის კიდევ ერთი შეხსენება იმისა, თუ რამდენად მნიშვნელოვანია ჩვენი მუშაობა ევროკავშირში და მის საზღვრებს მიღმა კანონის უზენაესობის მხარდაჭერისა და ხელშეწყობის კუთხით“, -განაცხადა ევროკომისარმა ვერა იუროვამ და აღნიშნა: „ჩვენ მხოლოდ მაშინ შეგვიძლია, ვიყოთ სანდო, თუ ჩვენს სახლში წესრიგი იქნება“.
ბრიუსელში დაფუძნებული კომისია ბუდაპეშტსარ აძლევს წვდომას 15,5 მილიარდი ევროს ოდენობის სტიმულირების ფონდზე, რომელიც მიზნად ისახავს პანდემიის შემდეგ ეკონომიკის აღდგენაში დახმარებას, ასევე პოლონეთს წვდომა აქვს შეზღუდული 36 მილიარდ ევროზე. კომისიამ უკვე დაამტკიცა 25 ქვეყნისთვის ფინანსური დახმარების გაწევის საკითხი, პოლონეთი ამ ჯგუფში არის, მაგრამ ჯერჯერობით ქვეყანას თანხა არ მიუღია, რადგან კომისია თავს იკავებს ტრანზაქციისგან, ვიდრე პოლონეთის სასამართლო სისტემა არ გაუმჯობესდება. ევროკავშირში აცხადებენ, რომ პოლონეთის სასამართლოს დამოუკიდებლობასთან დაკავშირებით არსებობს სერიოზული შეშფოთება.