კომპანია „გუგლმა“ სამსახურიდან გაათავისუფლა ინჟინერი, რომელმაც თქვა, რომ ხელოვნური ინტელექტის ტექნოლოგიას აქვს გრძნობები. ამის შესახებ „ბიბისი“ წერს. მედიის ცნობით, გასულ თვეში ბლეიკ ლემოინმა გამოაქვეყნა თავისი თეორია იმის შესახებ, რომ „გუგლის“ ენობრივი ტექნოლოგია მგრძნობიარეა და ამიტომ მისი „სურვილები“ უნდა იყოს გათვალისწინებული.
„გუგლმა“ და ხელოვნური ინტელექტის რამდენიმე ექსპერტმა უარყვეს მოსაზრებები და 22 ივლისს კომპანიამ ინჟინრის გათავისუფლება დაადასტურა. განცხადებაში „გუგლმა“ თქვა, რომ ლემოინის მოსაზრებები „დიალოგის აპლიკაციების ენის მოდელის“ შესახებ (Lamda) იყო „სრულიად უსაფუძვლო“ და რომ კომპანია მასთან „მრავალი თვის განმავლობაში“ მუშაობდა ამის გასარკვევად. „დიალოგის აპლიკაციების ენის მოდელი“ არის თანამედროვე ტექნოლოგია, რომელსაც „გუგლის“ თქმით, შეუძლია, ჩაერთოს თავისუფალ საუბრებში. ბლეიკ ლემოინმა საუბრები გასულ თვეში დაიწყო, როდესაც თქვა, რომ ე.წ. ლამდა ავლენს ადამიანის მსგავს ცნობიერებას. ლემოინმა აღმოაჩინა, რომ „ლამდა“ ავლენდა თვითშეგნებას და შეეძლო, ესაუბრა რელიგიაზე, ემოციებსა და შიშებზე. ამან აიძულა ლემოინი, დაეჯერებინა, რომ მისი შთამბეჭდავი ვერბალური უნარების მიღმა შესაძლოა, მგრძნობიარე გონებაც იმალებოდეს. ინჟინრის დასკვნები „გუგლმა“ უარყო. ის ანაზღაურებად შვებულებაში გადაიყვანეს კომპანიის კონფიდენციალურობის პოლიტიკის დარღვევის გამო. ამის შემდეგ ლემოინმა გამოაქვეყნა საუბარი, რომელიც მას და სხვა პირს ჰქონდათ „ლამდასთან“, მისი მოსაზრებების გასამყარებლად.
ბლეიკ ლემოინი არ არის ხელოვნური ინტელექტის პირველი ინჟინერი, რომელიც საჯაროდ გამოდის მოსაზრებებით, რომ ხელოვნური ინტელექტის ტექნოლოგია უფრო ცნობიერი ხდება. ასევე, გასულ თვეში „გუგლის“ კიდევ ერთმა თანამშრომელმა გაუზიარა მსგავსი აზრები გამოცემა „ეკონომისტს“.