ევროპარლამენტარებთან ძალიან მეგობრული შეხვედრა გვქონდა, გავაცანით ჩვენი გეგმები, მათ შორის, 12 პუნქტის შესრულებასთან დაკავშირებით, – განაცხადა ირაკლი კობახიძემ საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“.
„ეს, შეხვედრა მეგობრულ სტილში გაიმართა. ჩვენ მათ გავაცანით ჩვენი გეგმები, მათ შორის, 12 პუნქტის შესრულებასთან დაკავშირებით და საბოლოო ჯამში, ძირითადად, ამ საკითხების ირგვლივ გაიმართა მსჯელობა. ჩვენ ვუთხარით ჩვენს მეგობრებს, კოლეგებს, რომ 12-ვე პუნქტთან დაკავშირებით გვაქვს ძალიან დეტალური გეგმა, რაც გულისხმობს პასუხისმგებელი სუბიექტების განსაზღვრას, ფორმატების შეთავაზებას, ვადებს და ა.შ.“, – განაცხადა კობახიძემ.
გადაცემის წამყვანის შეკითხვაზე, როგორი იყო ევროპარლამენტართა პოზიცია მმართველი გუნდის ხედვასთან დაკავშირებით, ირაკლი კობახიძემ განაცხადა, რომ გეგმა იმდენად მკაფიოა და დეტალურად გაწერილი, მისი გაკრიტიკებისთვის საბაბიც კი არ არსებობს.
მისი თქმით, ხელისუფლებამ 12 პუნქტის შესრულებასთან დაკავშირებით კრიტიკის საფუძველიც კი არ დატოვა, მაგრამ ოპოზიციის რადიკალური ნაწილი ამ პირობებშიც ახერხებს ბოიკოტის რეჟიმში ყოფნას, რადგან „ქართული ოცნების“ ხელისუფლებაში ყოფნის დროს ქვეყნის მიერ კანდიდატის სტატუსის მიღება მათ სუბიექტურ ინტერესებში არ შედის.
შეკითხვაზე, აქვს თუ არა ხელისუფლებას მოლოდინი, რომ ბოიკოტის რეჟიმში მყოფი ოპოზიცია სამუშაო ჯგუფებში ჩაერთვება დასავლელი პარტნიორების გზავნილებიდან გამომდინარე, სადაც ისინი მკაფიოდ მიუთითებენ, რომ მათი სურვილია, პროცესში ოპოზიციის სრული სპექტრი ჩაერთოს, კობახიძემ აღნიშნა, რომ კარი ღიაა და მათ ამის გაკეთება ნებისმიერ დროს შეუძლიათ.
„ჩვენ ჩვენს საქმიანობაზე შეგვიძლია, ავიღოთ პასუხისმგებლობა. რაც შეეხება ოპოზიციას, მათი საქმეა, რას გააკეთებენ და რას არა, ჩვენ, ასეც და ისეც, კეთილსინდისიერად უზრუნველვყოფთ 12-ვე პუნქტის შესრულებას ევროპული სტანდარტების მიხედვით“, – განაცხადა კობახიძემ.
მისივე თქმით, ხელისუფლება „ნაციონალური მოძრაობის“ ბუნებიდან გამომდინარე მუდმივად „კუ და მორიელის“ იგავ-არაკშია.
„ჩვენ მუდმივად ვართ „კუ და მორიელის“ იგავ-არაკში. დაისვამ ზურგზე და კბენის მეტი არაფერი შეუძლიათ. მათ არ შეუძლიათ, რაღაც პროცესში შემოვიდნენ კონსტრუქციულად. ეს არის მათი ბუნება. ასე იყვნენ ცხრა წელი, ხელისუფლებაში ყოფნის დროს და ახლაც იგივეა, 10 წელი, როცა ოპოზიციაში არიან. როცა საუბარი გვაქვს „კუ და მორიელზე, აქ კუ არის არა „ქართული ოცნება“, არამედ ქართული სახელმწიფო“, – განაცხადა ირაკლი კობახიძემ.