შეიძლება, არ მოგწონდეს კონკრეტული პოლიტიკოსი, არ ემხრობოდე მის პოლიტიკურ ნაბიჯებს, მაგრამ ოჯახის შეურაცხყოფა კატეგორიულად მიუღებელია, – განაცხადა თბილისის მერმა, კახა კალაძემ.
კალაძემ კომენტარი გააკეთა „მთავარი არხის“ ჟურნალისტის კითხვაზე მმართველი პარტიის თავმჯდომარის, ირაკლი კობახიძის პასუხებთან დაკავშირებით.
მერის თქმით, ყველაფერზე წინ უნდა დავაყენოთ ურთიერთპატივისცემა.
„ვგმობ იმ დამოკიდებულებას, რაც არის ხოლმე გარკვეული ჟურნალისტების მხრიდან, რაც ძალიან საწყენია და ძალიან ცუდია. ხაზი მინდა გავუსვა იმას, რომ მნიშვნელოვანია ურთიერთპატივისცემა. შეიძლება, არ მოგწონდეს კონკრეტული პოლიტიკოსი, არ ემხრობოდე მის პოლიტიკურ ნაბიჯებს, მაგრამ ეს შეურაცხყოფა, ოჯახის შეურაცხყოფა კატეგორიულად მიუღებელია. შესაბამისად, ყველაფერზე წინ დავაყენოთ ურთიერთპატივისცემა და დამოკიდებულება ერთმანეთის მიმართ.
როდესაც ხარ ჟურნალისტი და აყენებ შეურაცხყოფას რესპონდენტს, არ აქვს მნიშვნელობა პოლიტიკოსია, შენ მოგწონს, არ მოგწონს, არ არის მისაღები და სწორი. ყველამ ყველაფერი უნდა გავაკეთოთ, რომ იყოს ურთიერთპატივისცემა.
იქნება ეს პატივისცემა? მერწმუნეთ, დამიჯერეთ, იქნება ათასჯერ მეტი პატივისცემაც, სიყვარულიც. ყველამ გადავაბიჯოთ ამ სირთულეებს. მესმის, შეიძლება, ვინმე არ მოგწონდეს, მაგრამ ეს ხომ არ ნიშნავს, შეურაცხყოფა მიაყენო?“, – განაცხადა კახა კალაძემ.