ფინანსთა მინისტრმა წარმოადგინა ჩვენი ხედვა, განისაზღვრა კრიტერიუმები და დადგენილებით აღნიშნული საკითხი მოწესრიგდება, რაც გულისხმობს, რომ ყოველ წელს, 2026 წლამდე, საჯარო მოხელეების ხელფასი მინიმუმ 10%-ით გაიზრდება, – ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის სხდომაზე განაცხადა.
მან ეკონომიკური შემოსავლების ზრდის გამო ბიუჯეტის კორექტირების აუცილებლობაზეც ისაუბრა.
„სავარაუდოდ, სექტემბრის თვეში მივმართავთ პარლამენტს და ბიუჯეტის კორექტირებას მოვახდენთ. ბიუჯეტი გაიზრდება, ვინაიდან სახელმწიფოს დამატებითი შემოსავლები გაუჩნდა მაღალი ეკონომიკური ზრდის გამო და რა თქმა უნდა, უფრო მეტი თანხები გვექნება გადასანაწილებელი უწყებების მიხედვით. უფრო მეტი პროექტები დაფინანსდება. ეს ასევე საშუალებას გვაძლევს, რომ კიდევ ერთხელ მინდა საზოგადოებას შევახსენო, რომ საჯარო სექტორში დასაქმებულებისთვის შრომის ანაზღაურება იზრდება. მინდა, ასევე შევახსენო საზოგადოებას, რომ წლების განმავლობაში, დაახლოებით, 2017 წლიდან 2020 წლამდე, საჯარო სექტორო სექტორში ხელფასები არასდროს გაზრდილა, რაც ვფიქრობ, დიდი შეცდომა იყო. ჩვენ თუ შევადარებთ კერძო სექტორსა და საჯარო სექტორს შორის ანაზღაურებას, ჩამორჩენა საგრძნობია და ამას მოწესრიგება სჭირდება. ამიტომ, წელს იანვარში უკვე დავიწყეთ ამის მოწესრიგება. იანვარში ყველა საჯარო მოხელისთვის ხელფასის ოდენობა 10%-ით გაიზარდა. ახლა ფინანსთა მინისტრმა წარმოადგინა ჩვენი ხედვა, განისაზღვრა კრიტერიუმები და დადგენილებით აღნიშნული საკითხი მოწესრიგდება, რაც გულისხმობს, რომ ყოველ წელს, 2026 წლამდე, საჯარო მოხელეების ხელფასი მინიმუმ 10%-ით გაიზრდება. საბოლოოდ, ჯამში დაახლოებით, 3-4 წლის განმავლობაში 50%-იანი მატება გამოვა“, – განაცხადა ღარიბაშვილმა.