სამოქალაქო სექტორის უმნიშვნელოვანესი როლის გამოყენება არაკეთილსინდისიერად ხდება. ფაქტობრივად, ამ სახელსა და მანდატს პოლიტიკური ამოცანებისა და დავალებების შესასრულებლად იყენებენ, – ამის შესახებ ფრაქცია „ქართული ოცნების“ თავმჯდომარის მოადგილემ, რატი იონათამიშვილმა საარჩევნო კანონმდებლობაში განსახორციელებელ ცვლილებებზე საუბრისას განაცხადა.
„ელექტრონული ფორმით არჩევნების ჩატარების პრაქტიკა უკვე არსებობს ქვეყანაში და ის ცესკოს მხრიდან საკმაოდ მაღალ დონეზე იყო ორგანიზებული. ჩვენი მიზანიც ეს არის, რომ ამ მხრივ კიდევ უფრო განვითარდეს და გაიზარდოს არეალი. არაკეთილსინდისიერად ხდება სამოქალაქო სექტორის უმნიშვნელოვანესი როლის გამოყენება. ფაქტობრივად, ამ სახელსა და მანდატს იყენებენ პოლიტიკური ამოცანებისა და დავალებების შესასრულებლად. ერთი მხრივ, ამბობდე, რომ შენ ხარ სამოქალაქო სექტორი და მეორე მხრივ, ტექნიკურ მთავრობასა და რადიკალიზაციაზე არა თუ საუბრობდე, არამედ პირდაპირ მოთხოვნებს აყენებდე, მინიმუმ არ ხარ გულწრფელი და მაქსიმუმ ეს არის ორმაგი სტანდარტი, რაც პოლიტიკურად მოტივირებულია“, – განაცხადა იონათამიშვილმა.
სარჩევნო კანონმდებლობაში ცვლილებებზე მომუშავე ჯგუფის ხელმძღვანელმა, დეპუტატმა გივი მიქანაძემ განაცხადა, რომ საარჩევნო კოდექსის რევიზია ეუთო/ოდირისა და ვენეციის კომისიის დასკვნების საფუძველზე უნდა განხორციელდეს.