“რუსეთი აწარმოებს მძლავრ საინფორმაციო კამპანიას უკრაინის ხელისუფლების, მათ შორის პრეზიდენტ ზელენსკის წინააღმდეგ”

უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის განცხადებით, რუსეთი აწარმოებს მძლავრ საინფორმაციო კამპანიას უკრაინის ხელისუფლების, მათ შორის პრეზიდენტ ვოლოდიმირ ზელენსკის წინააღმდეგ.

მისივე თქმით, მტრის პროპაგანდის ერთ-ერთი ნარატივი არის ის, რომ მსოფლიო უკრაინის მოვლენებმა დაღალა.

„ეს სიმართლეს არ შეესაბამება. მთელი ცივილიზებული სამყარო მხარს უჭერს ჩვენს ერთიანობასა და მთლიანობას“, – განაცხადა მან.

დანილოვმა ხაზგასმით აღნიშნა, რომ მთავრობა, რუსეთის ფართომასშტაბიანი შეჭრის პირველი დღიდან, ერთ გუნდად მუშაობს და ყოველდღიურად იმართება შეხვედრები უსაფრთხოებისა და თავდაცვის სექტორის მთავარი წარმომადგენლების მონაწილეობით.

უკრაინის ეროვნული უსაფრთხოებისა და თავდაცვის საბჭოს მდივნის განცხადებით, მიმდინარე ომის „გაყინვა“ არავითარ შემთხვევაში არ შეიძლება, რადგან რუსეთის ფედერაცია, ადრე თუ გვიან, უკრაინის მიწებზე მაინც შეიჭრება.