„ნაცმოძრაობის“ წევრის, ლევან ბეჟაშვილის განცხადებით, „ქართული ოცნების“ პარტიული აქტივი არ უნდა ფინანსდებოდეს სახელმწიფო ბიუჯეტიდან. ასე უპასუხა მან კითხვას, რომელიც წალენჯიხის ოპოზიციონერი მერის, გიორგი ხარჩილავას მიერ სკოლამდელი აღზრდის დაწესებულებებში დასაქმებულების გათავისუფლებას ეხებოდა.
„ყველამ ძალიან კარგად ვიცით, რა ხდება ადგილობრივ მუნიციპალიტეტებში. ბუნებრივია, ეს არის მიუღებელი. „ქართული ოცნების“ პარტიული აქტივი არ უნდა ფინანსდებოდეს სახელმწიფო ბიუჯეტიდან. წალენჯიხის მაგალითზე ეს კონკრეტულად გამოვლინდა არაერთ შემთხვევაში. ამიტომ ვფიქრობ, რომ საბოლოო გადაწყვეტილება იქნება დასაბუთებული წალენჯიხის რაიონული ადმინისტრაციის მხრიდან და მხარეებს ექნებათ საშუალება, რომ ეს საკითხები სასამართლოში განიხილონ“, – აცხადებს ლევან ბეჟაშვილი.
წალენჯიხის მერია საჯარო მოხელეების სამსახურიდან გათავისუფლების შემდეგ, საბავშვო ბაღის აიპის თანამშრომლებსა და სკოლამდელი აღზრდის დაწესებულებებში დასაქმებულებს ათავისუფლებს. გათავისუფლების შესახებ ბაღების თანამშრომლებს, დახურულ თათბირზე აცნობეს და უთხრეს, რომ მიზეზი, ბავშვთა კვებისთვის საჭირო თანხების სიმცირეა. წალენჯიხის მერიის გადაწყვეტილება ბაღების თანამშრომლებმა აქციით გააპროტესტეს.