ჩვენ, ის დეპუტატები, რომლებიც აღარ ვართ „ქართულ ოცნებაში“, ვერასოდეს გავხდებით რადიკალური ოპოზიციის წევრები, ვთვლით, რომ ამ რთულ ვითარებაში ყველაზე მაღალი ფასი დაედო სიმართლეს, რომელიც საზოგადოებამ უნდა იცოდეს, არადა ქართულ პოლიტიკურ სპექტრში უმეტესწილად, ან ბოლომდე ვერ აფასებენ სწორად, ან არ აწყობთ, ან ვერ ამბობენ ღიად სათქმელს და ვერ ბედავენ საუბარს, – ამის შესახებ დიმიტრი ხუნდაძემ პარლამენტის პლენარულ სხდომაზე განაცხადა.
დიმიტრი ხუნდაძის განცხადებით, იმისთვის, რომ სპეკულაციისთვის არ დარჩეს სივრცე, იგი კიდევ ერთხელ ხაზგასმით გამოხატავს „ქართული ოცნებიდან“ გასული დეპუტატების პოზიციას.
„დიახ რუსეთი ოკუპანტია. დიახ, უკრაინაში შეიჭრა პუტინი, დიახ ამ ბრძოლაში გამარჯვებას ვუსურვებთ უკრაინას. დიახ დასავლური ღირებულებები არის ჩვენი საზოგადოების არჩევანი, თითოეული ჩვენგანისთვის მიმზიდველი, მაგრამ ამას გვერდს ვერ ავუვლით როცა ჩვენი ქვეყნის უსაფრთხოება და მისი ინტერესები დგება სასწორზე. დასმული კითხვები იმასთან დაკავშირებით, როცა ომის რიტორიკა ისტორიულ ხასიათს ღებულობდა და ეს ისტერია არ შეჩერებულა დღესაც, ჩვენ სწორედ ამიტომ დავსვით კითხვები და ველოდით კონკრეტულ პასუხს, რომ ეს ეჭვები გაფანტულიყო საზოგადოებაში, რომ ის კონკრეტული ფაქტებს, რაზეც ჩვენ გვქონდა საუბარი – პასუხი გაეცემოდა. ჩვენ პასუხად მივიღეთ ის, რომ ეს კითხვები ეფუძნებოდა ტყუილს. ვფიქრობ, ჩვენი ქვეყნის უსაფრთხოების თვალსაზრისით და საზოგადოების ინტერესებიდან გამომდინარე, მთავარ კითხვებზე უნდა ყოფილიყო პასუხი გაცემული“, – განაცხადა დიმიტრი ხუნდაძემ.