ამ კონფერენციით კიდევ ერთხელ მოხდა ლუსტრაცია, ვის რა მიზნები და ამოცანები გააჩნია, – ასე აფასებს საპარლამენტო უმრავლესობის წევრი, რატი იონათამიშვილი ეკონომიკური პოლიტიკის კვლევის ცენტრის მიერ ორგანიზებულ კონფერენციას.
„როგორც ჩანს „ნაციონალური მოძრაობის“ მთავარი ამოცანაა, საქართველო იყოს სარტყელი სხვა ქვეყნის და იმ ქვეყნის, რომელიც დღეს ომშია ჩართული. ფაქტობრივად ეს ნიშნავს საომარი მოქმედებების ზღუდედ უნდა გადაიქცეს თურმე საქართველო უკრაინისთვის. ოპოზიციამ ზუსტად ეს ნარატივი აჩვენა ამ კონფერენციის დროს და ზუსტად იმავეს იმეორებს“, – განაცხადა რატი იონათამიშვილმა.
ეკონომიკური პოლიტიკის კვლევის ცენტრის მიერ ორგანიზებული ორდღიანი კონფერენცია დასრულდა. კონფერენციაზე სახელწოდებით „დიდება უკრაინას“ მთავარი განსახილველი საკითხები უკრაინაში მიმდინარე ომი და გეოპოლიტიკური პროცესები უნდა ყოფილიყო, თუმცა მმართველ გუნდში აცხადებენ, რომ საერთაშორისო ტრიბუნა, რომელიც ოპოზიციას უკრაინის მხარდასაჭერად უნდა გამოეყენებინა, ამჯერადაც საკუთარ მიზნებს მოარგო.