საპარლამენტო უმრავლესობის წევრის, გიორგი კახიანის განცხადებით, „საერთო სასამართლოების შესახებ“ კანონში ყველა ცვლილება მიმართულია იმისკენ, რომ კანონმდებლობა მეტად სრულყოფილი იყოს და ამ კუთხით წინ გადაიდგას ნაბიჯები.
მისივე თქმით, ოპოზიცია თუ ფიქრობს, რომ კანონმდებლობაში რაიმე არაკონსტიტუციურია, საკონსტიტუციო სასამართლოს უნდა მიმართონ.
გიორგი კახიანი დარწმუნებულია, რომ დასახელებული კანონი არაკონსტიტუციური არ არის.
„ყოველი ცვლილებით კანონმდებლობის მეტად სრულყოფა ხდება. „საერთო სასამართლოების შესახებ“ კანონში ყველა ცვლილება მიმართულია იქითკენ, რომ წინ გადავდგათ ნაბიჯი რათა სრულყოფილი კანონმდებლობა იყოს. რა თქმა უნდა, რეფორმები მომავალშიც გაგრძელდება, მაგრამ ოპოზიცია თუ ფიქრობს, რომ კანონმდებლობაში რაიმე არაკონსტიტუციურია, კეთილი ინებონ და საკონსტიტუციო სასამართლოს მიმართონ. მათ მხოლოდ დემაგოგიური და უსაფუძვლო განცხადებები ახასიათებთ, ქმედებებით არაფერს აკეთებენ. მათ აქვთ შესაძლებლობა, საკონსტიტუციო სასამართლოს მიმართონ, რომელიც კანონის კონსტიტუციურობაზე იმსჯელებს. თუ მიმართავენ, სასამართლო იტყვის თავის გადაწყვეტილებას. დარწმუნებული ვარ, ეს კანონი არაკონსტიტუციური არ არის“, – განაცხადა გიორგი კახიანმა.