რამდენიმე დღის წინ, 22 წლის ირანელ-ქურთი ქალი მაჰსა ამინი ე.წ. მორალის პოლიციამ “ჰიჯაბის ტარების წესის დარღვევისთვის” დააკავა. ამინი ოჯახთან ერთად თეირანში ნათესავების მოსანახულებლად მიემგზავრებოდა, რა დროსაც ახალგაზრდა ქალი პოლიციამ ძალის გამოყენებით დააპატიმრა.
თვითმხილველების თქმით, 22 წლის მაჰსას პოლიციის ფურგონში ყოფნისას სასტიკად სცემეს, რის შემდეგაც ქალი კომაში ჩავარდა. ფაქტის ამსახველი ვიდეო სოციალურ მედიაში გავრცელდა, სადაც ნაჩვენებია, თუ როგორ აკავებენ ე.წ მორალის ოფიცრები ქალებს, კადრებში ჩანს, რომ ისინი ქალს ძალით მიათრევენ.
მაჰსა ამინი დაკავებიდან რამდენიმე საათში საავადმყოფოში ტვინის შერყევის მსგავსი სიმპტომებით გადაიყვანეს. მისი ოჯახის თქმით, საავადმყოფოში მისვლიდან მალევე გოგონა გარდაიცვალა.
თავის მხრივ, პოლიციაში ბრალდებებს უარყოფენ და აცხადებენ, რომ ახალგაზრდა ქალი “მოულოდნელად გულთან დაკავშირებული პრობლემების გამო გარდაიცვალა.”
მაჰსა ამინის ოჯახი ამტკიცებს, რომ ქალი სრულიად ჯანმრთელი იყო და გულთან დაკავშირებული პრობლემები არ ჰქონია.
მაჰსა ამინის გარდაცვალებას ქვეყანაში პროტესტი მოჰყვა. დაკრძალვაზე ზოგიერთმა ქალმა პროტესტის ნიშნად ჰიჯაბი მოიხსნა. შეკრებილები ასევე სკანდირებდნენ – “სიკვდილი დიქტატორს”. ირანის უსაფრთხოების ძალებმა აქციის მონაწილეებს ცეცხლი გაუხსნეს.